Alrededor di 550 militar Hulandes a yega Bahamas. Nan lo brinda asistencia na habitantenan di e isla Abaco, un di e islanan cu a keda destrui pa horcan Dorian. Barco di marina Zr. Ms. Snellius a yega cerca di 7am ora local den e teritorio, sigui pa Zr. Ms. Johan de Witt pa 4or di atardi.
Segun un comunicado di Defensa Hulandes, e prome prioridad ta pa evalua e situacion riba e isla. Pa e motibo aki a manda un cantidad di militar riba helicopter di antemano na un hospital y na e haf riba e isla Abaco. Ademas nan a sinta na mesa cu autoridad local y organisacionnan internacional di ayudo pa saca afo unda tin e necesidad mas pisa pa ayudo.
“E prome dia ta e marca di coordinacion”, segun comandante Ad van de Sande tocante e mision. “E prome militarnan a yega na e isla via helicopter pa inventarisa unda e poblacion di e isla tin e mayor necesidad di ayudo. Ademas nos ta ocupa cu preparacion pa hiba nos personal y nos materialnan di ayudo riba tera. Den e proximo dianan nos lo dedica na esaki.”
Defensa a pone 550 militar Hulandes di marina, ehercito, forsa aereo y marechaussee na disposicion di Disaster Relief Bahamas. Ademas tin 50 militar Frances y 50 Aleman kende a yega pa aporta na e mision.
Ademas di personal, tin e aporte di material. Zr. Ms. Johan de Witt a aporta como transporte amfibio e posibilidad di hiba producto riba tera pa desembarca. Como un barco di prospeccion hidrografico, Zr. Ms. Snellius por mapa daño bou awa y otro blokeo pa asina haci hafnan di Abaco accesibel di nobo.
A bordo di e barconan tin entre otro transporte pa hiba articulonan di necesidad rond di e isla, material di construccion, y palet cu awa y cuminda. Cu aporte di e Cougars di forsa aereo tambe por mapa e tereno for di aire. Ademas ta disponibel e helicopter pa hiba articulo di necesidad rapidamente riba tera.
E militarnan Hulandes a ofrece nan ayudo bou peticion di gobierno di Bahamas. E coordinacion di operacion di ayudo ta den man di Caribbean Disaster Emergency Management Agency (CDEMA) y Cruz Cora Internacional.
