ORANJESTAD – Serlimar Sui Generis, como un compania estatal, tin e responsabilidad importante di e maneho di desperdicio y alabes proteccion di nos medio ambiente.
E aña aki Serlimar S G a cuminsa den luna di juni, en conexion cu dia di medio ambiente, cu e proyecto Milieustraat 2018, pa asina cumpli cu e responsabilidad nan aki, cu e meta principal pa conscientisa nos comunidad pa deshaci di desperdicio na un forma responsabel, pa asina hunto nos yuda cu e proteccion di nos medio ambiente.
Milieustraat 2018 tabata un proyecto cu colaboracion entre diferente departamento di gobierno, manera D.O.W., B.C.I. y Serlimar Sui Generis, caminda di comienso te na final a traha hunto y esaki a duna resultado nan sumamente positivo y a haci cu e proyecto a transforma den uno grandi y sumamente exitoso, segun un comunicado di prensa.
Pa Milieustraat 2018 pa e temporada di Fin di Aña, manera tradicion di tur aña, Serlimar Sui Generis ta ricibi e aporte financiero di Aruba Tourism Authority, y hunto ta boga pa engrandece e conscientisacion en conexion cu proteccion di nos medio ambiente, door di reconoce nos impacto pa maneho di desperdicio. E aña aki desde luna di november a cuminsa, y a termina den luna di december, caminda a bishita 7 diferente bario den tur districto di Aruba. Serlimar S G a resumi un total di 90 container grandi di 30yrd, cu a wordo acumula durante e periodo aki cu ta yega na un total di mas cu 2.064,240 kilo di desperdicio. A ricibi tur tipo di desperdicio, manera muebles di cas, desperdicio di construccion, desperdicio di cura, airco bieu y desperdicio di metal y kimico cu ta wordo recicla y deshaci na un forma responsabel pa proteha nos medio ambiente.
Directiva di Serlimar Sui Generis ta sumamente contento, y ta yama danki na nos Minister di Medio Ambiente pa e sosten pa cu e proyecto aki, sigur na tur e habitante nan cu a haci bon uzo di e oportunidad aki, caminda a registra nan adres pa asina nan por wordo yuda cu nan desperdicio cu nan kier deshaci di dje. Tambe ta felicita e ekipo di Afvalinzameling y ploeg nan di Mantencion Bo bario, cu a traha duro pa 5 siman largo pa haci e Milieustraat aki uno sumamente exitoso.
Un danki extenso ta bay pa cu Bureau City Inspector y A.T.A. cu a haci e proyecto aki posibel. Milieustraat 2019 ta continua y comunidad di Aruba por keda pendiente pa ki tempo lo cuminsa cu e bunita proyecto aki pa e proximo aña.
[maxgallery id=”33999″]
