(AP) — Miles di hende a reuni na Montenegro ayera pa demanda oficialnan di seguridad mas halto renuncia despues di un tiroteo masivo cu a mata 12 hende, incluyendo dos mucha.
Gritando “Renuncia” y “Asesinonan,” e manifestantenan pafo di e edificio di Ministerio di Asuntonan Interior den e capital, Podgorica, a pidi pa minister di Interior Danilo Šaranović y vice prome minister pa Seguridad y Defensa Aleksa Bečić retira.
Milo Perović, di un grupo dirigi pa studiante cu a organisa e manifestacion, a bisa cu varios hende inocente a muri durante nan gobernacion. “Boso no a proteha nos, pues renuncia!” Perović a bisa.
Oranan antes, centenares di hende a tene 12 minuut di silencio pa e 12 victima na un manifestacion na Cetinje, e capital historico di Montenegro unda e tiroteo a tuma luga diaranson siman pasa. Esaki ta e segundo masacre asina den e pueblo den menos cu tres aña.
Hopi residente di Cetinje y otro Montenegroense ta kere cu polis a maneha e situacion malo y cu nan no a haci suficiente pa aumenta seguridad desde e prome masacre, cual a sucede na augustus 2022.
E tiroteo di diaranson a origina for di un pleito na un bar. Un homber local di 45 aña a bay cas pa busca su arma prome cu bolbe na e bar y los tiro. El a mata cuatro hende na e sitio ey y ocho mas na otro sitionan prome cu el a tuma su mesun bida.
E masacre a causa preocupacion tocante e nivel di violencia den sociedad Montenegrino, cual ta dividi politicamente. Tambe el a trece pregunta tocante e preparacion di institucionnan estatal pa enfrenta e problema, incluyendo posesion di arma.
Polis a bisa cu e tiroteo tabata imposible di pronostica y preveni, aunke e tirado, ken nan a identifica como Aco Martinović, tabatin a ser condena den pasado caba pa conducta violento y posesion ilegal di arma. Mayoria di su victimanan tabata amigo- y miembronan di famia.
Autoridadnan Montenegrino a anuncia rapidamente un ley di arma mas estricto y otro medida fuerte pa reduci arma ilegal, cual tin den abundancia den e nacion Balkanico cu mas o menos 620,000 residente.
Ayera polis a bisa cu nan a registra algun sitio den e pais y a confisca rond di 20 arma, mas di 500 balanan di municion y explosivo.
E manifestantenan na Cetinje y Podgorica tambe a pidi pa un “demilitarisacion” di e poblacion door di destrui arma ilegal, impone impuesto halto pa posesion di arma y un moratorio pa licencia nobo mientras e licencianan actual ta ser reconsidera bao criterianan estricto.
E atacado di 2022 na Cetinje a tira 10 hende, incluyendo dos mucha, prome cu un otro a tir’e mata.
Maja Gardašević, un organisador di e manifestacion, a bisa durante e manifestacion na Cetinje cu “nos a bin aki pa busca respuesta” pa algun pregunta. “Dicon un masacre a pasa na Cetinje pa un segundo bes?” Gardašević a pregunta. “Dicon ningun hende no ta responsable? Dicon ta asina dificil pa renuncia?”
