(AP)—Miles di hende a marcha den ciudad- y pueblonan na Kenya durante protestanan diasabra tocante e asesinatonan recien di mas cu un decena di hende muhe. E demostracion antifemecidio tabata e evento di mas grandi organisa den e pais contra violencia sexual y basa riba genero.
Den e capital di e nacion, Nairobi, demostrantenan a bisti T-shirtnan cu nombernan di e hendenan muhe cu a bira victimanan di homicidio e luna aki. E grupo grandi, componi mas tanto di hende muhe, a para trafico.
“Stop di mata nos!” e demostradonan a grita mientras nan a wanta posternan cu mensahenan manera “No tin hustificacion pa mata hende muhe.” E grupo na Nairobi tabata agresivo contra intentonan pa e representante parlamentario pa hende muhe, Esther Passaris, pa adresa nan. Acusando Passaris di keda silencio durante e ultimo ola di asesinatonan, dmostradonan a grita pa e baha di scenario cu cantonan di “Unda abo tabata” y “Bay cas!”
“Un pais ta ser husga no pa con e ta trata su hendenan rico, sino pa con e ta cuida di e esnan debil y vulnerabel,” segun e presidente di Law Society of Kenya, Eric Theuri, ken tabata presente entre e demostradonan.
Media di Kenya a reporta e asesinatonan di al menos 14 hende muhe desde e comiendo di e aña, segun Patricia Andago, un reportero di data na media y compania di investigacion Odipo Dev, ken tambe a participa den e marcha.
Odipo Dev a reporta e siman aki cu cuentanan di noticia a mustra la menos 500 hende muhe a ser mata den actonan di femicidio entre januari 2015 pa december 2023. Mas y mas caso ta keda sin ser reporta, Andago a bisa.
Dos caso cu a sacudi Kenya e luna aki tabata envolve dos hende muhe cu a ser asesina na acomodacionnan di Airbnb. E segunda victima tabata un studiante di universidad cu a ser desmembra y decapita despues cu e supuestamente el a ser secuestra pa placa.
E cabes di e studiante di Jomo Kenyatta University of Agriculture and Technology a ser descubri den un dam dialuna, un siman despues cu a descubri su curpa den bari di sushi na e cas alquila. Dos hende homber di Nigeria a ser deteni den conexion cu su morto.
Un siman prome cu esey, e curpa di un otro hoben femenino a ser descubri den un apartamento cu varios herida cu ta indica cu el a ser staca despues cu el a topa cu un hende homber cu el a conoce online. Polis tin un sospechoso identifica como John Matara deteni. Varios hende muhe a bin dilanti bisando cu nan a alerta polis previamente di supuesto actonan di tortura pa Matara pero e nunca a ser condena.
Theuri, e presidente di Law Society of Kenya, a bisa cu casonan di violencia basa riba genero ta tuma demasiado largo pa haya audiencia den corte, cual e ta pensa ta anima perpretadonan pa comete crimennan contra hende muhe.
“Na e momento aki, nos tin un deficit di aproximadamente 100 hues. Nos tin un deficit di 200 magistrado y miembronan di hurado den corte, y pues esey ta nifica cu e wiel di husticia ta bira slow como resultado di provision- of recursonan inadecua,” el a bisa.
