(DW) – Centenares di miles di persona a manifesta diamars ultimo na henter Argentina pa rechasa e recorte di fondonan di universidad publico, loke ta constitui e mayor manifestacion, te awor, contra e politica di ahustenan di e presidente Javier Milei.
Entre 100.000 persona segun Polis, y mey miyon, segun Universidad di Buenos Aires (UBA), a reuni na capital Argentino, mientras otro miles di hende mas a protesta na otro ciudadnan “den defensa di educacion universitario publico y gratuito.”
Entre e manifestantenan di e Marcha Federal Universitario tabatin studiantenan, docentenan, personal universitario, ademas di sindicatonan, politiconan y organisacionnan social presente den e cayanan di e pais.
Sociedad Argentino a defende educacion publico, debi na politica di ahuste di Milei, cu ademas di aplica su ‘motosierra’ ta considera esaki como un “neishi di adoctrinamiento.”
Segun Ministerio di Seguridad, solamente na Plaza de Mayo, na unda e marcha di Buenos Aires a conclui y a transcuri entre Congreso y Cas Ros (sede di Gobierno) a concentra entre 10.000 pa 150.000 persona.
Pero e cantidad di hende na Avenida de Mayo, 9 de julio y cayanan rond por aumenta e number ey cerca di mey miyon manifestante.
Na 1984, Argentina bao e presidencia di Julio Argentino Roca, a implementa e ley 1420 di educacion comun, gratuito y obligatorio, base di e sistema educativo nacional actual, cu a inclui educacion superior universitario gratis y ta alcansa stranheronan.
“Nos ta yiunan orguyoso di universidad publico Argentino,” presidente di Federacion Universitario di Argentina (FUA) Piera Fernandez, a señala de su discurso ora e marcha a culmina na Buenos Aires.
E dirigente universitario a afirma cu “educacion ta un derecho humano fundamental, pasobra ta impone su mes riba desigualdad,” y a considera e situacion aki “como un periodo critico consecuencia di politica di Gobierno Nacional.”
Den su discurso, a reclama e actualisacion di salarionan y gastonan di funcionamento pa motibo cu, a bisa cu universidad publico “tin balornan di september 2022 den luna di maart 2024,” tambe a pidi pa mehora e pensionadonan y e restitucion di e Fondo Nacional di Incentivo Docente.
Aunke sociedad civil ta esun cu a convoca e marcha aki, varios politiconan a presenta.
Entre e asistenanan na e manifestacion di Buenos Aires tabata e gobernador peronista Axel Kicillof, e ex-minister di Economia y adversario di Milei den ultimo eleccion presidencial, Sergio Massa y e presidente di radicalismo, e senador Martin Lousteau.
Tabata un evento di sociedad Argentino, cu a mobilisa den paz y sin incidentenan, manera e mesun autoridadnan di Seguridad a reconoce.
Pa e actonan na Buenos Aires a asisti representantenan di Universidad di Buenos Aires un di e mas importante di Latino America, y di otro centronan educativo di e capital, incluyendo algun centro priva.
Tambe tabatin mobilisacion na Santa Fe, Mendoza, Entre Ríos, Río Negro, Neuquén, Jujuy, La Pampa, La Rioja, Misiones, San Juan, San Luis, Santiago del Estero, Catamarca y Chubut.
