Miles di persona diasabra ultimo a marcha riba caya di Santiago di Chile pa mustra nan posicion contra e redaccion di un Constitucion nobo y fomenta e opcion di rechasa e proceso constituyente den e proximo referendum den luna di april.
Cu e grito di ‘Rechaso, rechaso. Nos no kier miseria. Nos no lo ta ni Cuba ni Venezuela’, e ciudadanonan a manifesta na bario di Las Condes, pa mustra desacuerdo cu e idea di un Carta Magna nobo.
Entre e gritonan di e personanan cu a asisti pa e concentracion y e pitamento di autonan cu tabata pasa cerca pa motiba e personanan, e mobilisacion a desaroya cu normalidad y sin incidente.
E Constitucion Chileno actual, hereda di e dictadura di Augusto Pinochet (1973-1990), ta den duda como e origen di desigualdad na e pais.
E protestanan social cu ta desaroya na Chile desde october ultimo contra e modelo socio- economico Chileno y e Gobierno di Sebastian Piñera, y cu a laga por lo menos 30 persona fayecido, a pone den mira e carta Magna.
Desde e poder Legislativo a alcansa un acuerdo entre oficialismo y oposicion pa concretisa un proceso constituyente den cual e ciudadanonan lo dicidi riba e futuro di e Constitucion.
Dia 26 di april proximo e ciudadanonan ta convoca pa dicidi si nan ta aproba e creacion di un Carta Magna nobo of nan ta keda cu esun cu nan tin.
E opcion ultimo, esun di mantene e texto fundamental actual, ta e mesun cu nan a defende na e cayanan capitalino.
