Miles di persona di Partido Colorado na mando di Paraguay a expresa nan respaldo diamars pasa na e Presidente di Paraguay, Mario Abdo Benítez, riba un plasa di e centro di Asuncion pa via di e crisis cu Gobierno ta atravesa, y a expresa rechaso na e peticion di oposicion pa un huicio politico.
Cu un discurso entusiasma, e presidente Paraguayo a keda emociona den varios ocasion y a reconoce cu e siman ultimo tabata ‘e dianan mas dificil’ di su bida y a pidi pa trata di forma mas rapido posibel e peticion pa huicio politico di e acta bilateral riba e compra di energia pa e dam di Itaipú, cu a ser firma cu Brasil na luna di mei.
“Mi no tin nada pa teme, mi tin mi consenshi trankil. Marito (manera e ta conoci) nunca lo bay ta mas importante cu Paraguay. Mi ta pidi boso pa trata e huicio politico di manera mas rapido posibel”, e Presidente a grita dilanti di e multitud.
Ademas, el a acusa e oposicion di tin ‘interes egoista’ y cu nan no por yega na poder pasobra nan no por’conkista e curason di e pueblo Paraguayo’.
Abdo Benítez, compaña pa su vicepresidente, Hugo Velázquez, a insisti cu ‘lo aclara, cu lo investiga’ e caso pa paz por bolbe bek na e pais.
E oposicion ta pidi huicio politico pa e presidente y vice-presidente, ora ta keda dos dia pa cumpli cu e prome aniversario di posesion di poder.
Pa su huicio, e Ehecutivo a traiciona e interes di e patria y a baha cabes pa interes di Gobierno Brasilero.
E acta cu Brasil a causa diferente protesta cu a laga como resultado e renuncia di varios cargo halto, e anulacion di e documento y e declaracion di e Fiscalia tanto di Abdo Benitez, como di Velazquez.
