(NLTimes) – Cada aña, miles di mucha y hoben na Hulanda ta bay den crimen. Segun un estudio publica ayera pa Centro contra Traficacion Humano y di Mucha (CKM), mas di 2,500 victima hoben a wordo forsa pa comete ofensanan criminal den 13 ciudad investiga den ultimo dos aña. Den e periodo aki, autoridadnan tabata na altura solamente di 68 caso na nivel nacional.

Segun vocero di CKM, Shamir Ceuleers, esaki ta mustra cu explotacion criminal di mucha y hoben ta mas tanto un ‘pilar invisible bao di e modelo di entrada di criminalnan. “Si nos faya den identifica y protege e victimanan aki, tin un bon chens cu nos ta bay perde nan na e circuito criminal”, Ceuleers a bisa.

Ta forsa e menornan di edad pa comete un variedad di crimen, manera ofensa di droga, robo, y reclutamento pa prostitucion. Hopi biaha ta involucra mucha y hoben vulnerable cu no por, of no ta tribi, di pidi pa ayudo pa nan mes. Algun biaha nan no ta na altura cu nan ta un victima, of tin miedo di e autor, of di wordo castiga nan mes.

Segun CKM, e menornan aki pa e motibo aki por keda den un situacion explotativo pa un tempo largo. Si nan bin den e situacion, hopi biaha esaki ta como autor y no como victima.

Pa por recluta victimanan hoben pa ofensanan criminal, e autornan intencionalmente ta busca scolnan basico, scolnan vocacional of hasta institutonan di cuido. Hopi biaha ta forsa e menornan pa comete crimennan cu ‘formanan sutil di coercion’. Por ehempel, autornan ta abusa e posicion vulnerable di e mucha, un posible discapacidad intelectual leve, minorianan of problemanan di debe y adiccion.

Alrededor di 1,600 profesional di cuido primario, manera trahadornan social pa hoben, agentenan policial comunitario, y oficialnan di atendencia di scol a participa den e encuesta aki. Al menos mita di nan a bisa cu nan tabatin contacto cu hobennan sospecha di ta victima den ultimo dos aña. Ademas, binti porciento a bisa cu nan conoce un victima kende a wordo explota criminal- y sexualmente.

“Na momento di combati esaki y preveni reclutanan hoben, nos mester realisa cu no tur hende cu comete un ofensa criminal ta hacie boluntariamente”, Ceuleers ta bisa. “E realisacion aki ta falta den e maneho Hulandes.”

Minister Hulandes di Seguridad y Husticia a comisiona e rapport. E ta contene varios recomendacion pa minister Dilan Yeşilgöz-Zegerius.

Riba potret: Minister Dilan Yeşilgöz-Zegerius.