DEN HAAG - Boeren protesteren op het Malieveld in Den Haag onder de naam #Agractie. De betogers vinden dat de agrarische sector te veel maatschappelijke problemen op zijn bordje krijgt, van fosfaat- en stikstofreductie tot klimaatbeleid en dierenwelzijn. ROBIN UTRECHT

Minister di Agricultura, Carola Schouten (ChristenUnie) a bisa criadonan di porco, baca y otro animal, cu e ta scuchando, y cu e cantidad di baca y porco den granjanan Hulandes no lo ser disminui na mita bou su encargo, den un discurso durante un protesta grandi di criadonan na Den Haag ayera.

Organisado di e demostracion, criado di carne Bart Kemp, a bisa Schouten cu el a ‘haci un desaster’ cu politica agricultor. E futuro di miles di famia ta den riesgo pa ‘e plannan lansa sin cuidou di Jesse Klaver y Rob Jettens’, kende segun Kemp, no tin idea kico nan ta papia. E tambe a bisa cu e criadonan ta cansa di wordo yama ‘criminal ambiental’ mientras nan ta esunnan cu ta provee cuminda pa e pais.

Tanto Klaver (GroenLinks) como Jetten (D66), kende anteriormente a propone pa e criadonan corta cu mita nan cantidad di animal, a ricibi critica na e reunion na Malieveld cerca di compleho parlamentario.

Schouten, kende tin un background agricultor su mes, a bisa den su discurso cu niun persona por ignora e criadonan awo y cu e ta scuchando. “Criamento di bestia na Hulanda ta desaroyando, y boso metodonan ta diferente di esun di boso mayornan. Boso yiunan lo haci cos diferente atrobe. Esey ta e fortalesa di nos agricultura.” El a agrega cu tanten cu e ta minister, no lo forsa criadonan pa disminui e cantidad di animal cu nan ta cria.

VVD, CDA, ChristenUnie y PVV a sali den sosten pa e criadonan, cu presidente di fraccion CDA den parlamento, Pieter Heerma, bisando cu e ocasion tabata uno ‘historico’. Hopi di e sosten di e partido tradicionalmente ta bin di e criadonan. Geert Wilders a subi un tractor y a yama e manifestantenan ‘heroenan di sociedad’.

Polis ta sperando mas disturbio riba caya mientras e criadonan ta bay cas. Caminda na Hulanda a registra trafico record ayera mainta, mientras e miles di cunukeronan a sali pa Den Haag pa participa den e demostracion, hopi di nan riba tractor.

Organisacion di motor, ANWB a bisa cu e ‘rush hour’ ayera mainta, cu mas di 1,100km di trafico tabata e pio den historia – cu rij di 40km riba A2 for di Utrecht na Den Haag.