(AFP) – Miles di manifestante a subi cayanan di e ciudadnan principal di Colombia pa rechasa e proyecto di reforma tributario di gobierno iskierdista di Gustavo Petro, memey di un fuerte devaluacion di e moneda local cu e dollar.
Bisti cu paña blanco y cu banderanan di Colombia, e manifestantenan a mobilisa pa di dos biaha cu e frase “No mas Petro”, e presidente cu a yega na poder dia 7 di augustus como e prome presidente di iskierda di e pais.
“Awe nos ta pidi gobierno pa tene na cuenta e sector productivo di e pais, pa compronde cu no tin mester di reforma tributario den e manera con nan ta haciendo”, empresario Alvaro Patricio, di 58 aña a bisa memey di e manifestacion na Bogota, cu despues a caba pa via di yobidanan.
Cu reclamonan similar, e protestanan a recore e cayanan di Cali, Barranquilla, Medellin, entre otro ciudadnan.
Congreso ta debatiendo un proyecto di reforma fiscal plantia pa Gobierno cu ta spera di duna mas impuesto na e clase mas halto pa financia cu recursonan nobo programanan social contra pobresa y desigualdad.
Mientras tanto, e pais ta bao efecto di inflacion global y un devaluacion historico di e moneda local cu e dollar. Desempleo tambe ta golpia e 10.6% di e poblacion laboral activo.
Petro a conkista mas di e mita di e votadonan total na Colombia cu un proposicion ambicioso di reformanan cu ta inclui un transformacion fiscal, stop explotacion petrolero y reparti terenonan fertil pa campesino “sin tereno”, entre otro.
E ex-presidente derechista Ivan Duque (2018-2022) a enfrenta protestanan masivo na 2019, 2020 y 2021, esun di mas pio a tuma luga aña pasa ora el a purba di impone medidanan na clase media pa enfrenta e consecuencianan di e pandemia, loke a causa manifestacionnan violento cu a extende pa mas di dos luna y a laga 46 morto, entre civil y polis, segun ONU.
