Miles di carchi di inmigracion haya den container: ATA ta asumi responsabilidad y pidi dispensa

Ayera miles di carchi di inmigracion procedente di Aruba Tourism Authority (A.T.A) a wordo haya benta den un container na Italiestraat. Tur e carchinan cu informacion personal aki tabata accesibel pa publico, locual a wordo seriamente cuestiona den comunidad.

Bon Dia Aruba a tuma contacto cu A.T.A. y nos a haya e siguiente reaccion caminda e instancia aki ta asumi e responsabilidad aki y tambe nan ta pidi disculpa pa e inconveniencia cu e situacion aki por a causa. A.T.A. su reaccion ta bisa textualmente asina:

ATA

A.T.A. tin un proceso intensivo di con ta handle cu data incluyendo den esaki procesamento di carchi di inmigracion. A.T.A. su proceso normal ta cu e ta “shred” – destrui – e carchi nan di inmigracion y tambe ta hiba nan dump ora e incinerator ta cendi. A.T.A. tambe tin un recycle bin special pa e carchinan aki na A.T.A. mes. Como parti di e 2019 Radex upgrade cu a tuma luga – un proyecto lidera pa IASA, cu A.T.A. ta aplaudi –, A.T.A. a warda y proteha e carchi nan di inmigracion fisico den e warehouse di A.T.A. A dicidi di wanta esaki nan pa asina ora cu e sistema di inmigracion, cual ta Radex, ta back on track, A.T.A. por valida e hecho cu e cifranan nan ta corecto pa medio di control a base di e carchinan fisico.

Pues e carchinan a keda warda pa un tempo mas largo cu normal. Entretanto, A.T.A. a take care di gran mayoria di e carchi nan aki y a destrui nan y a hiba nan dump. Desafortunadamente den e estadio final di “opruiming” di e warehouse a keda poco carchi di inmigracion hunto cu otro material promocional bieu cu a wordo tira den e waste bucket di e warehouse.

Den e tantisimo aña cu A.T.A. ta trahando cu autoridadnan concerni y e sistema di RADEX, na ningun momento a perhudica e confianza di e socio concerni y di e turistanan. A.T.A. ta asumi responsabilidad pa cu e hecho aki y ta asumi alabes e responsabilidad pa a remedia esaki inmediatamente. Cual a wordo haci! Por sigui confia riba e proceso cu A.T.A. y otro nan concerni ta adheri na dje.

Ta pidi disculpa pa e inconveniencia cu por a causa. A.T.A. ta maneha multipel (mas cu miyones) datonan pa añanan largo y lo sigui haci esaki debidamente! Semper a conta riba e confianza di e cliente nan y socio nan y lo sigura cu lo sigui haci esaki.