Dimas tratando permisonan mas lihe cu sistema digital
Mientras Dimas ta concretisando nan sistema digital di permisonan nobo, minister di integracion ta mirando posibilidad pa evalua casonan individual unda ‘e sistema mes pa via di formalidad ta nenga un prolongacion cu si bo wak bon e persona ta bin na remarke pe’.
Dimas den proceso pa mehora y digitalisa nan servicio cu nan sistema nobo Sirsa (Sistema Innovativo di Registro Stranhero Aruba) ta mustra por medio di un carnet cu nan ta otorgando en bes di e manera antiguo di duna permiso riba un A4 con leu nan a yega cu e proyecto di digitalisacion.
T’asina cu manera Dimas ta informa e personanan wardando pa permisonan actualmente lo ricibi un carnet, similar na un rijbewijs, ora cu nan permiso keda cla. Esaki compara cu antes ora mester a pasa un procedura largo pa djey haya un A4– cual segun minister di husticia Andin Bikker (POR) ‘no ta di e tempo ki mas’– awo e proceso pa hopi hende lo ta mas rapido, segun director di Dimas Kathy Ruiz-Paskel.
Peticionnan nobo trata ‘dentro di 1 luna’
Particularmente si ta trata di un prolongacion regular, Dimas lo haci nan maximo esfuerso pa otorga tal permisonan dentro di un periodo di 2 siman. Pero segun e director tin hende cu a logra haya esaki riba mesun dia of dentro di 2 dia. Pa peticionnan nobo of peticionnan cual ta encera un cambio Dimas lo mantene nan mes na un termino di 1 luna.
Dimas a invita minister di husticia hunto cu prensa pa asina haya un bista tras di cortina con e procedura nobo ta ora un persona tramita nan permiso. Nos por a mira cu despues di un periodo relativamente cortico, personanan ta haya nan carnet nobo.
Segun minister encarga cu integracion, anteriormente tabatin 6500 permiso tranca na Dimas. Pero cu un accion conhunto entre e ministerio y Dimas a logra baha e cantidad cu nan mester trata ainda pa 1086, segun nos a tende ultimo.
Retraso na LAR ‘enorme pa casonan di Dimas’
Minister a indica despues di sinta cu e comision encarga cu ley di derecho administrativo Lar cu tin un retraso enorme na e departamento aki netamente pa loke ta trata casonan di Dimas. Dimas mientrastanto ta indica cu den cierto casonan Dimas no tin cu bay te na Lar ora di evalua cu nan ta otorga e permiso cu nan a nenga originalmente toch. “Esaki no kiermen cu e decision original ta fout, pero posiblemente e persona a trece argumentonan of documentonan nobo cu ta pone cu e ora ey nan si ta bin na remarke pa e permiso.”
Mirando cu minister ta considera cu den cierto casonan, particularmente ora ta trata di prolongacion, Dimas ta nenga permisonan cu no lo mester ta un problema, e ta sondeando posibilidadnan pa evalua casonan individual pa asina otorga e permisonan aki. “Nos tin cu mira bon pasobra ta poco straño si un persona bay prolonga nan permiso number X nan ta nenga esaki pa via di formalismo.”
Personanan cu ta cay den buraconan di LAR segun minister hopi biaha ta cay den incertidumbre unda por ehempel ta perde nan status di asegurado na AZV, ‘e ta zorg pa casonan hopi inhumano y innecesario’. “Nos ta ocupa evaluando e casonan individual unda pa via di e propio sistema ta nenga un persona cu si bo wak e bon lo a bin na remarke pa un permiso.”
