Presidente di El Salvador Nayib Bukele, dialuna pasa a desplega 1.000 soldaat nobo pa trata di kita control di gangnan na cinco ciudad. Esaki ta parti di un plan cu a ser lansa 20 di juni pasa.
Ta trata di e ciudadnan di Chalatenango (noord), Sensuntepeque (noordoost), San Francisco Gotera (noordoost), San Vicente (oost) y Zacatecoluca.
Bukele, kende a yega te na e centro di San Salvador pa tira un bista riba e elementonan nobo di ehercito, a sigura cu e grupo aki ta forma parti di e 3.000 militar cu cual e ta busca reforsa su plan di siguridad.
E mandatario, cu a ricibi critica di varios sector dor di ta militarisa e siguridad publico, a sigura cu e uzo di e ehercito ta respalda pa constitucion di El Salvador, cu ta duna espacio pa uza forsa ora ‘tur opcion pa pacifica e teritorio nacional a caba’.
E operacion ta conta cu 7.000 elemento di Polis Nacional Civil (PNC) y di ehercito cu ta concentra na 22 localidad, cu e cual Bukele ta busca recupera e control di e teritorio y kita e fuente di financia di e gangnan.
Recientemente, gobierno a pidi Congreso 91 miyon dollar pa financia e di dos etapa di e plan, cu ta inclui programanan den e comunidadnan pa discuti e manera con gangnan ta busca di hobennan pa forma parti di ‘Las Maras’.
Autoridadnan di El Salvador ta responsabilisa e halto cifra di homicidionan na e gangnan MS13, Barrio 18 y otro mas chikito. E cifra ta encera cu pa cada 100.000 habitante tin entre 103 y 50,3 persona asesina entre 2015 y 2018, un cifra cu ta ubica e nacion como un di e mas violento di mundo.
