Mike Petronia ta un tata cu for di dia cu su yiu Sayuri a perde su bida, a cuminsa un lucha pa pidi husticia. Pero no solamente esey, e ta considera cu seguridad na Aruba ta den peliger, unda “polis ta traha duro pa detene esnan cu ta comete crimen, pero hues ta laga nan bay.”

Den un entrevista cu Bon Dia Aruba, Petronia a conta cu Sayuri a ser asesina 4 di juni di aña 2021. Dos aña despues di e hecho lamentabel aki, Petronia a cuminsa e caminda unda el a asisti na diferente cita cu Ministerio Publico, Ministerio di Husticia, departamento cu ta representa rey Willem-Alexander na Aruba. Hasta el a bay Hulanda pa entrega un carta na minister presidente y el a haya un contesta di minister di Husticia den cual tabata indica cu “cosnan di Aruba, ta Aruba mes personal tin cu bin pa cambia ley.”

Den esaki Petronia tambe a sigura cu minister di Husticia di Aruba, Rocco Tjon a priminti na Petronia cu e ta bezig pa aumenta castigo.

El a bay Corte di Prome Instancia unda hues a dicta nuebe aña y ademas tratamento di Terbeschikkingstelling (TBS) pa e hoben responsabel (I.P.) cu a comete e acto castigabel di mata su yiu, kende na e momento ey tabatin 17 aña di edad. Den esaki, Petronia ta sigura cu den ley ta indica cu si un persona menor di edad ta comete un crimen grandi, e por haya un castigo como adulto, cu ta locual hues a dicidi den prome instante.

Dia 1 di december di 2021, e hoben aki a cumpli 18 aña y hunto cu su abogado Albert Kock a dicidi di bay Hoger beroep debi cu nan no tabata di acuerdo cu e sentencia di hues di prome instancia. Petronia a señala cu e hoben acusa a cambia full su testimonio den hoger beroep, indicando cu el a comete un fout y cu e no tabata dispuesto pa tira Sayuri, segun e otro hoben envolvi den caso aki a afirma. “Sayuri a bis’e tres biaha, no punta scopet riba mi. Si bo ta pone un scopet riba un hende ta pasobra bo ta mind pa bay tira e persona; y awor hues a acepta tur e comedia ey. Aworaki e castigo ta di cuatro aña y dos aña den un instituto, cu ta casi igual cu loke e amigo di dje cu tambe tabata eynan dia cu nan a comete e crimen, a haya.”

Petronia den su opinion ta sigura cu su yiu no a haya un “fair chance” ora el a haya cu e persona responsabel di e morto di su yiu a haya e mesun castigo cu e amigo cu tabata cune, cu ya caba a sali for di prison y a bay Hulanda pa drenta den un instituto.

“Cu e decision di e hues aki e responsabel tambe ta bay sali e aña aki pa subi un avion bay den un instituto, y pa 2025 e ta homber liber. Algo aki no ta klop,” Petronia a bisa.

E ta para den esey aworaki, na unda el a informa cu e tin un cita cu Ministerio Publico den e dianan aki pa wak con e caso aki ta bay continua.

“Mi yiu muhe ta dera y nan ta sali liber den dos aña. Esun cu a tira mi yiu ta sali liber e aña aki mes y ta bay den un instituto, no ta fair,” el a declara.

Manifestacion pacifico

Den mesun linea, Petronia a solicita na Cuerpo di Polis un permiso pa haci un manifestacion pacifico, unda e ta pidi pueblo di Aruba uni cune pa demostra cu loke a sucede cu Sayuri no ta husto. Ademas e ta señala cu “awe ta mi yiu, mañan por ta e yiu di otro hende. No ta tocante asesinato so, ta tocante tur cos, pasobra polis ta traha duro y detene esnan cu ta haci fout, ta haci robes y hues ta laga nan bay. Pakico polis ta traha anto?”

E manifestacion pacifico pa un bon causa ta organisa pa dia 10 di augustus pa 12.30 di merdia, unda nan ta bay cana for di Linear Park te Ministerio Publico y trece e mensahe “cu e situacion no ta normal. E situacion no ta sigur. Polis ta haci su trabao y hues ta dicidi pa laga esnan cu ta comete barbaridadnan bay. Algo tin cu haci pa drecha e sistema. Minister di Husticia Rocco Tjon a priminti cu e ta bezig ta trahando cu esey, for di februari e ta bezig y awe nos ta na juli, e no ta sali ni bisa nada,” el a expresa.

Igualmente el a trece dilanti cu diferente container a ser poni na dos warda di polis tanto na San Nicolas como na Oranjestad na luna di maart ultimo pa hendenan laga nan arma di candela eynan, pero nada mas nos no a scucha. “Minister no ta bisa nada, bisa pueblo algo, kico nos ta bay haci? Con nos ta bay ataca e problema y e huesnan, con e castigonan por ta asina na Aruba, unda cu na Corsou y Hulanda e castigonan ta diferente. Loke a pasa cu Sayuri a duna e menornan di edad e green light pa haci mas malo pasobra nan sa toch cu nan no ta bay haya castigo di menor di edad,” el a finalisa.

Decision di hues 10 di juli ultimo

Riba 10 di juli ultimo Corte Superior (Hof) a dicidi riba e apelacion. Hof ta diferencia cu Corte di Aruba y Hof a aplica husticia di menornan. Hof ta mira base pa aplica husticia di menornan mirando e personalidad di e sospechoso I.P. y mirando e circunstancianan bao cual e delitonan a ser haci. For di e rapportnan di expertonan ta conclui cu I.P. for di un edad hopi hoben caba tabatin problema di comportamento, tambe cu e tin un inteligencia media (gemiddelde intelligentie) y cu mayoria bes e ta reacciona impulsivo sin pensa riba e

consecuencianan.

Expertonan ta di acuerdo cu otro cu I.P. mester haya un tratamento obligatorio intensivo den un institucion cera. Hof ta mira cu cerca I.P. tin posibilidad pa desaroyo pedagogico. Hof ta constata tambe cu I.P. durante tratamento di e caso no a duna Hof un impresion di ta social-emocionalmente madura. Alabes Hof ta constata cu algun delito a ser haci den grupo di muchanan y cu no por exclui cu por tabatin peer pressure (groepsdruk) riba I.P.

Pa loke ta castigo, Hof ta impone riba I.P. un detencion hubenil di 4 aña. Fuera di e detencion hubenil ey, Hof ta impone riba I.P. un medida di 2 aña den un Institucion pa Hobennan (P.I.J.). E medida di P.I.J. ta bin despues di e 4 aña detencion hubenil y e P.I.J. por ser prolonga cu 2 aña mas si resulta necesario.