Ayera den oranan di mainta, lider di partido AVP Mike Eman hunto cu lider di fraccion Marlon Sneek a ofrece un conferencia di prensa dilanti di Gabinete di Gobernador pa duna informacion tocante un audiencia cu nan a tene cu Gobernador.

Eman a expresa cu nan a entrega un carta na Gobernador y nan a duna un splicacion di loke tin di haci cu un preocupacion grandi cu nan tin pa loke gobierno demisionario cu, manera el a sigura, ta den proceso “di un intento di fraude electoral”.

“Un di e cosnan mas grandi cu e democracia di un pais tin ta e legitimidad cu ta haya for di un proceso electoral husto, transparente y confiabel,” el a indica.

Tambe el a referi na e hecho cu pueblo semper a mira e proceso di eleccion como uno confiabel, pa motibo cu e ta un proceso habri y transparente caminda cu comunidad por conta e votonan y por mira cu e conteo ey ta wordo observa door di comunidad, cu tin su representacion pa medio di partidonan politico na momento di conteo di voto.

“E pensamento di bay introduci un proceso di scanning di e voto algun siman promer cu eleccion, ta algo absurdo pasobra cu pa hopi e ta bira algo cu nan tin cu bay siña ainda con pa haciele y e ta bay crea un inquietud grandi den comunidad,” Eman a declara.

E hecho cu e persona tin cu vota den e proceso tradicional y despues e tin cu haci e scanning, hustamente ta bay haci e proceso aun mas largo. “Si nos tabata papiando den contexto di Covid pa e proceso cana mas liher, e proceso di scanning aki ta bay alarga e proceso mas y cu Aruba no por permiti su mes na e momento aki pa bay experimenta cu e sistema democratico di eleccion confiabel cu semper tabatin,” Eman a trece dilanti.

Tampoco por bin cu leynan na e momentonan aki pa motibo cu gobierno ta demisionario y segun el a menciona no por sa cu cual tipo di mayoria e gobierno aki por conta den parlamento, despues di tur e disturbio cu tabatin den coalicion. “No tin ningun base di apoyo ni formal y tampoco moral pa cana e caminda aki,” Eman a enfatisa.

Nan ta kere cu “ora un gobierno ta sinti cu e pueblo ta cla pa manda nan cas, di un forma abrumador kier haci un intento di fraude electoral cu nos no ta bay permiti,” el a bisa.

Segun Eman, “si nan ta considera cu nan kier bay cambia e sistema di votacion, nan mester tuma lunanan largo pa tur partido duna nan aprobacion na cambionan electoral y cu no por cambia e reglanan fundamental di un manera na unda ta impone e tipo di cambionan asina y cu nan no tin base legal pa hacie”. “Nos ta kere cu aki tin hopi cos pa bay wordo investiga di biaha tambe, pa mira kico ta e forsanan tras di e idea aki, kico ta e pensamentonan tras di idea aki,” Eman a expresa.

E carta ta mustra cu na nomber di e partido AVP y na nomber di e fraccion “cu e gobierno demisionario aki no tin e derecho di haci cambionan den un sistema di eleccion caminda cu e confiansa den e proceso electoral ta asina crucial” y pa e motibo aki nan a haci un bishita na Gobernador.