Por a tuma nota cu nos ex Prome Minister, Mike Eman a bolbe lanta cabes despues di su biahe recien pa Hulanda. Un ex Prome Minister cu e anochi di eleccion a dicidi di tuma su retiro for di politica pa motibo cu su partido no a saca mayoria y tabata sa cu e no lo forma gobierno y no kier bay den Staten, demostrando cobardia di bin debati, pero sigur bin defende su 7822 sostenedonan cu ainda tabata confia den su persona.
Criminalidad
Su cobardia di no bin como miembro di parlamento ta pasobra su persona sa cu e lo tin di duna cuenta pa su mal maneho hiba durante 8 aña y cu awendia pueblo tin cu confronta cu e realidad unda cu pais Aruba conoce un crisis financiero, economico y social. Ironicamente den su articulo di Diario 30 januari 2018, pagina 28 su persona tin e curashi di describi un di e temanan primordial cu ta Criminalidad y con por preveni esaki. Y mi ta cita locual Sr. Eman a declara: “Pero e raiz di criminalidad ta bin na momento cu un pais deteriora social y economicamente, su ciudadanonan ta cay den un desesperacion, cu e forma di famianan no ta funciona mas, e barionana no ta funciona mas, scolnan ta bou presion, institutonan cu mester yuda forma sociedad ta den crisis, cuminda no ta riba mesa, e ora bo ta haya tur rangvoorwaarden, circunstancianan cu ta conduci cu un pais ta cay den un decadencia di criminalidad.”
Crisis financiero
Esaki netamente ta e herencia cu sr. Eman a laga atras. Aruba a keda atras den crisis financiero unda cu a laga un presupuesto 2017 atras cu un deficit financiero di 130 miyon y no a entrega presupuesto 2018 cu tin un deficit financiero di riba 200 miyon florin. E ‘Tiger di papel’ aki aumenta nos debe nacional di 43% pa 86 % den 8 aña, unda cu su persona sin ningun clase di consenshi y bou di e pretexto di keda inverti den e pais, a crea un chaos financiero cu a conduci cu Aruba financieramente ta bou di curatela, pasobra su persona a bira adicto na malgastamento di placa di Pueblo. Sr. Eman a laga un economia tranca unda cu comerciantenan a perde confianza den e maneho hiba door di ex gobierno y muestra di esaki ta Caya Betico Croes. Hopi desempleo bou di nos hobennan y tambe hopi tata y mama di famia a perde trabao door cu hopi negoshi a cera nan porta.
Decadencia social
Scolnan yena cu retonan unda cu no a sa di inverti den scol y cu maestronan tur dia tin di traha bou presion debi na falta di ayudo social cu a ser neglisha door di Gabinete Mike Eman 1 y 2. Scolnan den hopi mal estado fisico unda muestra di esaki ta cu siman a habri cu maestronan cu pa 6 aña a ser neglisha debi na falta di renobacion di nan scol y nan alocacion ta laga di desea. Nan a sali manifesta nan disgusto y cu e speransa cu e gobierno nobo aki si por yuda nan. Barionan unda cu a conoce hopi decadencia social, centro di barionan inactivo cu por brinda ayudo social, institutonan social cu mester atende cu tur e problemanan creciente door di falta di maneho a ser laga sin recurso financiero pa haci nan trabao, pero unda a corta den nan gastonan pa por reenforsa mas hende pa por cumpli cu e crisis social creciente na Aruba. Riba esaki a para banda di criminalidad na momento cu a dicidi di kita radarnan, a kita e helicopter, a neglisha Cuerpo policial unda no a inverti ni den bala, auto y falta di personal pa atende cu criminalidad.
Mike riba otro planeta
Pues esakinan ta netamente pakico pueblo a vota pa trece cambio debi cu nos ex Prome Minister tabata mas den exterior y awe ora bo lesa su declaracion bo tin di pensa cu e tantisimo biahamento mester a afecta su celebro pasobra pa bo bin skirbi algo asina di berdad bo no por ta bon di cabes. Ta bo mesun persona a goberna pa 8 aña e pais aki y sigur bo maneho desastroso a conduci na tur e problemanan cu awendia nos ta confrontando cu su persona ta yama rangvoorwaarden pa criminalidad. Pues tin di conclui cu bao di su gobierno pueblo a deteriora pero ta su so no kier wak esaki hunto cu su coleganan. Pa finalisa, si ta tanto bo ta stima bo pais, bo mester ta den Parlamento pa defende bo maneho di 8 aña pero tambe defende derecho di bo sostenedonan y no para na banda y skirbi disparate unda cu ta parce cu sr. Eman tabata riba otro planeta tur e 8 añanan, kisas debi na e tantisimo biahamento cu a afecta su mente.
