ORANJESTAD – Miembronan di AVP lo tene un reunion di conseho di partido diaranson awor. Ex premier y lider di partido AVP, Mike Eman a declara cu den e reunion aki nan lo explora e forma con nan lo recauda fondo y financia nan campaña politico, despues di experiencia cu ex minister Paul Croes a pasa aden, relaciona cu e caso Ibis.

E ta haya cu ta un responsabilidad di nos tur pa analisa esaki. Ya caba nan a yega di reuni den varios ocasion pa trata e asunto aki, y determina kico ta e siguiente paso cu nan organisacion politico por tuma di cambia structura y dependencia for di fondonan cu ta bini di e sector priva. Nan ta dispuesto pa acerca otro partidonan pa papia riba e tema aki tambe.

Ley di financiamento
Contestando pregunta di Bon Dia Aruba riba ley di financiamento di partidonan politico y con esaki no a wordo concretisa durante nan di dos periodo di gobernacion, Eman a laga sa cu otronan den pasado tambe a yega di fracasa den nan intento, ya cu e ta un ley cu por data di 25 aña pasa cu ta den lachi. E ta haya cu cada bes, tur gobernacion y parlamento a cuminsa traha riba dje, pero nunca finalmente por haya otro riba dje.

E motibo ta –segun Eman- cu e ley su proposicion ta bon, pero ora cu nan ta mira su efectonan den otro paisnan, e ‘ta yen di buraco.’ E buskeda pa bin cu un ley perfecto cada bes ta larga e periodo.

E ta spera cu awor cu minister presidente, Evelyn Wever-Croes a anuncia cu e ley aki lo bira realidad durante su gobernacion, e por logr’e.

Tanten e lider di AVP a declara cu nan si no ta bay warda riba e ley aki, ya cu nan ta kere cu e ley riba su mes ta bin cu cierto reglanan, pero finalmente den e institutonan politico mes lo mester tuma luga e proceso aki, pa asina logra e resultado cu bo no por logra unicamente cu un ley.

E no ta descarta un acercamento cu otro partidonan pa atende cu e ley aki, ya cu un ley asina -cu ta regarda tur partido politico- lo mester carga sosten amplio. E ta kere cu tin e suficiente madurez den e partidonan politico pa por sinta na mesa, pa nan por haci e ley di financiamento di partidonan politico funciona. Pero e ta indica cu te hasta den e ley aki, sector priva ta keda cu e derecho di sostene e partidonan politico.

Sinembargo, a pesar di e bondad di un ley asina, e ta haya cu e ley mes no ta niun garantia pa evita casonan di influencia incorecto, pero tambe casonan di percepcion incorecto. P’esey e ta kere cu banda di e ley aki, cu ta reglamenta e contribucion financiero pa e partidonan politico, nan tin cu cana e caminda, ya sea cu e financiamento aki ta wordo carga pa pais Aruba. Pero e ta kere cu Aruba no tin e recurso aki, manera si a yega di sosode den otro paisnan. Of e financiamento aki ta bin di nan miembronan individual -cu nan contribucion chikito- cu no ta crea un compromiso otro cu pueblo y pais.

Un forma ta a base di e contribucion di nan miembronan con nan lo por yuda carga e partido financieramente. Nan miembresia, cu ta alrededor di 20 mil debidamente cu nan carchi di afiliacion, lo por yuda den nan proposito, el a laga sa.

Pero e no ta facil –segun e lider politico- mirando e costo sumamente halto di propaganda y publicidad durante e periodo di eleccion. “E formanan cu nos ta hiba eleccionnan na Aruba e batayanan ta hopi intensivo, e mercadeo ta grandi y e participacion di e comunidad tambe ta grandi,” el a bisa.

Nan a purba di haci un biaha, pero ta pone cu compara cu otro partido, ta bira manera un competencia inhusto, ya cu uno lo tin mas recurso cu otro.

Sinembargo, e ta kere cu e confiansa y integridad cu e pueblo mester tin den su instituto politico, gobernantenan y dirigentenan politico, ta pisa hopi mas cu e recursonan cu bo tin pa haci campaña.