E diadomingo aki 29 di Mei AVP tabata den e bario di Bushiri cu dialogo riba BON COMUN. Mescos cu na Ayo y Noord e encuentro cu habitantenan di Bushiri na cas di Wina Tromp tabata exitoso y amabel. Na e pueblo di Bushiri a bini pa scucha pueblo y intercambia pensamento riba e deseonan pa cambio pa Aruba.
“Meta di un politica etico y servicio publico semper mester ta relata na un causa husto. For di principio di pensamento riba politica y servicio publico a busca un cuadra di referencia etico y husto pa ta e guia y e cuadra dentro cual ta duna contenido na accionnan di politica y servicio publico. Dialogo y reflexion riba e profundisacion aki ta forma parti di un serie di encuentronan cu AVP ta bay organisando den barionan, e lider di AVP mr. Mike Eman a splica na final di un encuentro comunitario asina den e bario di Bushiri. Partido ta sigui den otro barionan.
Atendencia na e atardi di combersacion bao deleite di un sopi crioyo tabata hopi fructifero. Eman a splica cu pensadornan profundo desde principio di politica a pensa hopi riba e pregunta fundamental di buskeda di e punto di orientacion pa politica y servicio publico. E pensadornan na cuna di filosofia politico di principio halto a bin na e conclusion cu eherce politica pa un pueblo su bienestar, su destino y futuro mester ta relata na locual nos Creador lo desea pa humanidad: eherce esfuerso pa bida riba tera wordo realisa mas hopi posibel den imagen di Reino di Dios, unda husticia y amor prohimo ta prevalece. Cu e strea di guia aki e pensadornan a conecta eherce politica na e concepto di BON COMUN (Bonum Commune; El Buen común; Algemene Welzijn; Common Good).
“Hunto cu esaki nos compromiso pa para uni cu Boso y lucha ainda mas fuerte pa transforma preocupacion, vision y ideanan nobo den un forsa di cambio pa trece back felicidad den hogarnan na Aruba”, un compromiso pa lucha pa cambio cu sigur ta resona den e situacion cu Aruba ta bibando, ta locual ta e line cora den e mensahe di e lider di AVP, mr. Mike Eman.
Eman a dirigi su mes na e comunidad di Bushiri cu un sentido di convivencia, responsabilidad y un spirito pensativo. A acerca cada ciudadano cu e palabranan amigonan y a scucha hopi dolor, pena y sufrimento cu tin den e bario y hogarnan. Su mensahe na e habitantenan tabata cu sea cual sea e retonan nos dilanti, desilusionnan cu nos ta biba, inquietudnan cu nos ta atravesando, confianza y speransa nunca nos mag di perde. Nos Creador a proteha nos cu e forsa di alma y curpa pa cambia locual no ta bon y no ta husto, pa libra nos di tur malo y provee oportunidad husto pa felicidad pa un y tur. Esey ta un Bendicion cu ta bin cu responsabilidad y compromiso na cual cada un di nos tin cu duna oido.
E lider di AVP mr. Mike Eman a afirma e compromiso aki y a subraya cu BON COMUN ta un condicion sagrado cu mester wordo garantisa y realisa pa un PUEBLO, COMUNIDAD y un PERSONA. “Awe mas cu nunca nos tin e tarea pa trece back politica y servicio publico riba e rumbo di orientacion etico y husto aki cu ta e BON COMUN. Ban haci e strea di guia aki atrobe nos punto di orientacion” mr. Mike Eman a enfatisa bao hopi apoyo di esnan presente na e encuentro comunitario exitoso aki na Bushiri.
