Durante di e protesta di contratistanan chikito y pueblo cu a bin para cu nan, e lider di AVP, Mike Eman, a mustra claramente e motibo di e decisionnan di persecucion politico di e gobierno di MEPORED y for di cua sentimento e decisionnan aki ta sali.
Eman a mustra riba e diferencia entre AVP y otro partidonan y na e decisionnan di minister Otmar Oduber. Eman: “Den nos scol e no a siña e venganza aki! El a drenta un scol di venganza y e ta siguiendo e liña di e scol di venganza aki, cu e mes un tempo tabata victima di dje. Mi ta lamenta cu el a adopta e mes un practicanan aki di un partido cu tin hopi aña caba ta biba a base di persecucion politico. E meta ta pa purba neutralisa e oponentenan politico, pa asina nan keda mas aña na poder pa asina nan tin mas beneficio propio pa nan mes y esunnan rond di nan. Tur esunnan den gobierno actual ta sigui e mes un liña di partido MEP. E liña di odio, venganza y persigui hende cu no ta di nan color politico. Den Playa Pabou nos a wak con leu e odio aki por yega. P’esey tin un caya cu yama Alo Tromp, caminda un hoben di 15 aña a bira victima di e tipo di persecucion y violencia politico aki di e mes un partido.”
Cu esaki, Eman a distingui AVP di e otro partidonan cu ta forma e gobierno actual di Aruba y di e pensamento cu ta reina den e gobierno actual. Esta cu tumamento di venganza politico ta algo normal den politica of di gobierno. Na un banda bo tin e pensamento cu ta biba y forma e base di tur decision y accion di AVP, esta cu tur hende den e pais aki tin e mes un derecho y mester wordo trata cu e mes un respet y mester haya e mes un oportunidadnan cu tur otro ciudadano. Cu niun hende tin mag di wordo persigui pa su opinion y simpatia politico, pasobra cada ciudadano tin e derecho pa libremente scoge, afilia y traha activamente pa un of otro partido. Basta e haci esaki cu e mes un respet pa e derecho ey cu cada otro hende tin!
Critica.
AVP a wordo critica na mas cu un oportunidad pa e forma di pensa aki. AVP a y ainda ta wordo critica pa acepta critica, ofensa, gañamento, insinceridad di hendenan cu a hasta haya trabou bou di gobierno di AVP y cu ta traha den departamentonan di gobierno. Un bon ehempel ta e hendenan cu a haya trabou pa mantene limpiesa canto di caminda bou gobierno di MEP. Tin di nan a haya e contract net prome cu MEP a bandona gobierno. Ora AVP a sinta no a kita of kibra contract di niun di e simpatisantenan di MEP. A hasta alarga nan contract ora esaki a caba. A haci esaki aunke algun di e mes un contratistanan aki tabata bay radio y television pa critica y ofende miembronan di AVP. Tin di nan a hasta participa den protestanan violento contra gobierno di AVP. Pero nunca a mishi cu niun di nan. E splicacion di Eman ta simpel y corecto: “Nan tin e mes un derecho cu cualkier otro pa haya trabou. Nan tambe tin famia cu mester tene cuenta cun’e.”
Asina Eman a pone loke ta e pensamento di partido den practica. Esta di no persigui niun hende of busca excuus pa kita trabou di hende djis pa venganza di politica partidista!
Esaki ta un standard y nivel di politica madura y di respet pa derecho di tur ciudadano cu otro partidonan ta profesa cu boca, pero ta practica lo contrario.
