E diadomingo aki 15 di Mei AVP tabata den e bario di Noord cu dialogo riba BON COMUN. Den un encuentro exitoso y amabel na cas di famia Tromp-Victoria- Zuñiga-Sprock na Palm Beach a bini hunto pa scucha pueblo y intercambia pensamento riba e deseonan pa cambio pa Aruba.
“Meta di un politica etico y servicio publico semper mester ta relata na un causa husto. For di principio di pensamento riba politica y servicio publico a busca un cuadra di referencia etico y husto pa ta e guia y e cuadra dentro cual ta duna contenido na accionnan di politica y servicio publico. Dialogo y reflexion riba e profundisacion aki ta forma parti di un serie di encuentronan cu AVP ta bay organisando den barionan, e lider di AVP mr. Mike Eman a splica na final di un encuentro comunitario asina den e bario di Noord. E ultimo tabata na Ayo y awor partido ta sigui den otro barionan.
Atendencia na e mainta aki di combersacion bao deleite di un sopi crioyo tabata hopi fructifero. A hiba palabra miembronan di partido y conseheronan: Lider Partido mr. Mike Eman, candidato Melvin Tromp, candidato Junior Croes, ex Presidente di Parlamento, Marco Christiaans, hoben profesional, Dennerich Kelly y Presidente di Asociacion di Contratistanan chikito Tony Geerman.
Eman a splica cu pensadornan profundo desde principio di politica a pensa hopi riba e pregunta fundamental di buskeda di e punto di orientacion pa politica y servicio publico. E pensadornan na cuna di filosofonan politico di principio halto a bin na e conclusion cu eherce politica pa un pueblo su bienestar, su destino y futuro mester ta relata na locual nos Creador lo desea pa humanidad: eherce esfuerso pa bida riba tera wordo realisa mas hopi posibel den imagen di Reino di Dios, unda husticia y amor prohimo ta prevalece. Cu e strea di guia aki e pensadornan a conecta eherce politica na e concepto di BON COMUN (Bonum Commune; El Bien común; Algemene Welzijn; Common Good).
E BON COMUN lo mester ta punto di orientacion, e compas moral pa tur accion politico manera un strea na shelo. E “BON” ta relata cu e resultado mester ta POSITIVO pa e ciudadano, y “COMUN” ta relata cu e resultado positivo mester conta pa TUR HENDE, henter e pueblo.
E principio di BON COMUN ta dirigi su mes riba e condicionnan cu ta necesario pa un persona y comunidad por FLORECE y por FORTALECE e BON COMUN. E condicionnan aki por varia, nan por ta di diferente indole, for di condicionnan practico na un banda, manera: alimentacion, paña pa bisti, trabao y empleo, entrada y por ehempel salud y educacion.
Na otro banda e florecemento di e BON COMUN ta garantisa tambe derechonan y obligacionnan intangible manera ta libertad di consciencia, libertad di religion y por ehempel derecho pa expresa y organisa nos mes. Es decir e BON COMUN ta aspira un conhunto di factornan social cu ta permiti e persona, su famia y comunidad realisa mas plenamente y mas facilmente nan perfeccion personal den harmonia y cooperacion cu otro.
Asina e BON COMUN ta un strea di guia continuo pa e dirigente, pueblo, comunidad y ciudadano tin un punto di orientacion a base di cual nan por desaroya y mehora nan mes, construyendo un mundo bon y comun cu sentimento, cu conexion, vision y futuro.
Esnan presente na Noord a comenta mescos cu na Ayo cu awe e meta di accionnan BON ta wordo lubida y tortura pa decisionnan cu ta haci mas malo cu BON. Y awe e meta cu resultado positivo mester wordo busca pa tur hende, pa nan ta COMUN ta wordo viola y a bira cu ta pa algun so tin prosperidad.
E lider di AVP mr. Mike Eman a afirma e preocupacion aki y a subraya cu BON COMUN ta un condicion sagrado cu mester wordo garantisa y realisa pa un PUEBLO, COMUNIDAD y un PERSONA. “Awe mas cu nunca nos tin e tarea pa trece bek politica y servicio publico riba e rumbo di orientacion etico y husto aki cu ta e BON COMUN. Ban haci e strea di guia aki atrobe nos punto di orientacion” mr. Mike Eman a enfatisa bao hopi apoyo di esnan presente na e encuentro comunitario exitoso aki na Palm Beach, Noord.
