Manera ta conoci caba diamars ultimo, Refineria di Aruba (RdA) a firma un ‘Letter of Intent’ cu dos compania cu nan a selecta como posibel partner, cu ta e companianan Quanten LLC y Eagle LNG. Tocante esaki parlamentario di partido AVP, Mike de Meza a trece dilanti cu te ainda e informacion cu a duna tabata hopi basico y cu nan no a indica ki tipo di trabao nan ta bay haci.

El a sigura cu nan no a detaya den ki tipo di negoshi nan ta bay inverti, kico ta e modelo di negoshi cu nan ta bay usa y con ta bay haci pa e proyecto aki bira un realidad, esey tabata un falta, segun De Meza a expresa.

“Den preguntanan cu a haci na e companianan por a ripara cu nan no tin acceso na crudo y ningun di nan a yega di opera un refineria,” el a sigura.

Tambe el a indica cu e companianan aki ta yega na un acuerdo cu gobierno pa despues nan por bay lobby y busca si tin interesado cu lo por uni y wak si lo por haci e proyecto aki algo real y factibel.

Den esaki, el a señala cu nan no ta mustra e seriedad cu ta necesario pa un proyecto grandi manera esaki. “Ora bo ta scucha cu nan ta papia di 3.5 biyon dollar y a puntra con nan a yega na e cifra aki, nan a contesta cu nan a bin Aruba, nan a sinta, discuti y calcula, y nan a yega na e suma di 3.5 biyon; asina bo no ta anda cu un proyecto di refineria,” De Meza a afirma.

Prome cu yega na un acuerdo pa un refineria mester tin un modelo di negoshi, mester analisa e diferente tiponan di refineria cu tin rond mundo y tin cu wak con por hinca esakinan den e modelo di negoshi, cu ademas mester tin un strategia su tras. Ademas mester tin un strategia financiero y economico, unda mester sa ki tipo di crudo ta bay procesa. Si kier yega na un tipo di producto esey no ta e dificultad, pa motibo cu riba mercado internacional tur producto tin nan specificacion, pero pa por procesa esey cada refineria tin un sistema y exigencia di e tipo cu ta usa como base pa diseña e configuracion pa un refineria, segun e parlamentario.

“Si bo no sa kico ta bay bira bo crudo, ki tipo di crudo y di unda e ta bini, e ora bo ta papiando di algo cu realmente bo no sa”, De Meza a splica.

Tambe el a trece dilanti cu a bisa cu gobierno di Merca lo a duna un garantia, pero segun De Meza, esey no ta berdad, loke nan (autoridadnan Mericano; red.) ta haci ta haya sa si un compania tin ‘red flags’, si tin acusacionnan di violacion di ley pero esey ta algo cu tur pais ta haci, pa tira un bista riba esaki. “Ora nos tabata negociando no solamente cu Citgo, nan a haci mesun cos cu nos y nan a duna luz berde”, De Meza a sigura.

El a conta cu ora nan a negocia sabiendo cu Pdvsa tabata doño di Citgo, Merca tambe a investiga esaki y a duna luz berde pa esey. Ora nan tabata negocia, por ehemplo cu Petrochina, tambe via gobierno di Merca a averigua y a duna luz berde pa cu esaki, pero pa loke ta trata garantia, nan no ta duna esey pa ningun compania y tampoco pa ningun deal comercial.

Pa loke ta trata e Refineria di Aruba, De Meza a specifica cu su presupuesto di gasto por core banda di 1.3 of 1.4 biyon. Esaki pa e refineria cu a pasa den man di Coastal, El Paso, Valero y finalmente Citgo, unda ta papia facilmente di 200.000 bari diario di procesamento, y cu por tin un presupuesto di benta anual cu ta surpasa 10 biyon dollar.

Ora bo tin un refineria di calidad superior grandi, tin cu bay pa un notificacion internacional, pa por haya interesadonan di nivel halto den e industria aki cu por acerca bo, pero ora bo tin un refineria den e condicion cu esun di Aruba ta awor, ta dificil pa haya companianan di e nivel ey.

“E refineria aki cu ta diseña pa crudo Venezolano, cu awor manera por mira tin su retonan, ta sumamente dificil pa bo por haya un operador pa opera e refineria aki”, De Meza a manifesta.

Nan como partido a bisa actual gobierno cu e refineria aki tin su retonan pero tabatin e necesidad tambe di atencion di gobierno, pa sinta cu ehecutivonan di Citgo y sigura cu nan lo a cumpli, pa sa kico ta pasando, pa sinta na mesa cu nan y busca solucionnan, pero esey no a wordo haci.

“Nan a duna orden pa wak con pa kibra e contract aki, of si por bay corte pa haci como si fuera e contract nunca a existi”, De Meza a sigura.

El a finalisa bisando cu un aña y mey despues cu e actual gobierno a sinta, nan a kibra e contract aki pa motibo cu nan tabata bisa cu Citgo no tabatin placa. Segun De Meza esey no tabata berdad, pa via cu Citgo tabata un di e corporacionnan di petroleo cu tabatin mas reserva, tambe a bisa cu tabata existi un embargo locual tampoco tabata berdad, segun e parlamentario.