E proceso prolonga y cada bes mas contencioso di screening di parlamentario y candidato pa minister di AVP, Mike de Meza, ta expone berdadnan incomodo tocante responsabilidad politico, confiansa publico y e standardnan rekeri pa eherce un cargo publico na Aruba.

Pa mas cu un luna, e nombramento di De Meza como minister di Infrastructura, Energia y Telecomunicacion den Gabinete AVP-Futuro a keda stanca. E motibo: problemanan pendiente cu impuesto vincula na un compania di cual antes e tabata propietario, cu, maske inactivo pa añas, ta parce di a laga asunto sin resolve, segun departamento di Impuesto (DIMP).

Team legal di De Meza ta argumenta cu e compania tabata inactivo desde 2009, hinca den un fundacion sin operacion activo ni benta. Nan ta insisti cu e preocupacion di DIMP ta bin di tecnicidad for di 2006 – casi dos decada atras – y ta insisti cu De Meza a cumpli cu tur obligacion necesario. Nan ta argumenta cu DIMP ta violando proceduranan legal door di mira mas leu cu e bentana di cinco luna pa revision fiscal usa tipicamente den screening.

Agregando na e controversia, anteriormente De Meza a pasa screening y a keda aproba pa un cargo publico durante su terminonan anterior como minister y parlamentario. Toch awo, e mesun problemanan – supuestamente resolvi – ta siendo revisa. Su sostenedornan ta cita esaki como evidencia di trato inhusto of prehuicio politico, mientras criticonan ta argumenta cu cualkier asunto sin resolve den e tratonan financiero di un figura publico merece scrutinio completo, sin importa cuanto tempo a pasa.

Mientras tanto, team di De Meza a reta formalmente e conclusionnan di DIMP, exigiendo un coreccion di un rapport negativo di screening y menasando cu accion legal si no haci e coreccion prome cu dialuna tardi. Su abogado ta enfatisa cu DIMP no a duna e “evaluacion general” rekeri di e comportamento fiscal di De Meza durante ultimo cinco aña, na su lugar enfocando riba detayenan speculativo di pasado. Pero e hecho cu De Meza no ta acepta su fayo den cumpli cu impuesto, sin importa cuanto tempo a pasa, ta refleha riba su caracter como empresario y como persona, y pio ainda como mandatario. Sin laga atras, si haci excepcion p’e e biaha aki, ta pone un precedente legal cu ta habri porta pa mal comportamento di otro candidatonan den futuro.

Mientras e disputanan tecnico aki ta continua, e daño ta bay mas leu cu e caso personal di De Meza. E proceso alarga a conduci na speculacion cu ta mina confiansa no solo den DIMP, sino den gobierno y integridad institucional. Comparacionnan engañoso a bolbe riba rednan social, implicando figuranan no relaciona – manera Gobernador di Aruba – den controversianan sin base. Mas e incertidumbre ta dura, mas erosion den confiansa di publico.

Pero mas leu di tecnicidad of procedura burocratico, e pregunta fundamental ta keda: Un candidato cu un historia di problema sin resolve cu impuesto, con cu interpreta esakinan, por ser confia cu un cargo publico importante manera minister?

Un minister no ta djis un administrador. Un minister mester representa respet pa estado di derecho, mester pone e standard pa responsabilidad civico y mester inspira confiansa di pueblo. Obligacionnan financiero no ta un formalidad tecnico, sino un deber civil. Ora un politico no cumpli cu e debernan aki – of ta permiti pregunta sin resolve pa persisti pa añas – no ta djis un fayo personal. E ta un violacion di confiansa di pueblo.

Defensornan di De Meza ta insisti riba su añanan di servicio publico y sacrificio personal – cerando su negoshi pa sirbi den gobierno. E servicio ey ta merece reconocemento. Pero servicio riba su mes no ta un excuus pa fayo den responsabilidad financiero of legal. De hecho, net pasobra De Meza tabatin cargo publico importante den pasado, e expectativa mester ta mas halto ainda.

Hasta si e logra legalmente pasa e proceso, e preocupacion mas amplio tocante responsabilidad, caracter y su aptitud ta bay keda. Aruba no por afford pa baha standard di esnan cu ta goberna den nos nomber. Integridad mester ta mas cu un palabra, e mester ta e expectativa minimo.

Mike de Meza por a dedica añas na servicio publico. Toch dedicacion no ta substitui cumplimento, transparencia y responsabilidad. Pa e medidanan aki, sin importa resultado legal, el a mustra su mes no apto pa sirbi como minister.

Unda Gabinete AVP-Futuro ta para?
 Finalmente, nos ta cuestiona e Gabinete mes, cu ta keda insisti riba un candidato cu ya a mustra di ta problematico. Haciendo esaki, e Gabinete ta mandando un mensahe preocupante: cu lealtad politico ta mas pisa cu principionan di responsabilidad y integridad cu un cargo publico ta exigi.

Nan sosten continuo, na momento cu tin duda publico serio claro, ta pone e credibilidad di henter e Gabinete den duda y ta mina confiansa publico den e gobierno nobo. Na lugar di pone un standard pa transparencia y conducta legal, e posicion di e Gabinete ta parce di normalisa – hasta hustifica – fayo den responsabilidad publico. Haciendo esaki, nan ta faya no solo nan mes sino tambe e ciudadanonan cu nan a hura di sirbi.