Mike de Meza parlamentario di AVP: “E experiencia di desigualdad, awe no ta existi mas”

Despues cu Corte Supremo ayera a duna su sentencia pa loke ta trata e matrimonio di mesun sexo, diferente reaccion a bin dilanti tanto di comunidad como di algun politiconan, manera ta e caso di Mike de Meza ken ta un parlamentario di partido di AVP cu for di comienso a duna su apoyo na e topico aki.

Ayera redactor di Bon Dia Aruba a puntra na De Meza kico ta su opinion riba e decision di Corte Supremo caminda el a señala cu “esaki ta un decision sumamente importante pa Reino Hulandes den su totalidad. Akinan nos ta papiando di un veredicto cu ta ser aplica cu ta crea e base igual den tur seis isla Caribense Hulandes y tambe Hulanda. E ta un derecho fundamental y esey mi a bisa den Parlamento tambe, cu nos ta papiando di un derecho civil, un derecho cu cada persona mester tin, cu ta hancra den nos Constitucion tambe como e prome articulo cu tin. E ta algo grandi y mi kier a duna un pabien na tur esnan cu den un forma of otro a sinti y a experiencia e desigualdad aki y awe esey no ta existi mas,” De Meza a splica.

De Meza a comenta cu tin un ideologia, opinionnan y analisisnan cu cada persona ta tuma pa su mes, “nos ta papiando di derecho fundamental y semper como partido y lider di nos partido Mike Eman semper esey tabata su punto di bista, cu na fin di dia cada persona tin cu pensa, analisa y papia cu su famia pa wak con e ta wake y tuma su decision. Pa asina ey tuma un decision sin peso di otro pero cu ta husto cu abo por huramenta, defende y para su tras. Esey cada un di nos a haci.”

Riba e pregunta si tabatin cierto diferencia den partido AVP mirando cu algun di e miembronan di partido cu tambe ta den parlamento no tabata di acuerdo cu e tema aki, el a sigura cu “den escogencia si nos tabatin diferencia pero nos por biba cu esey.

Na fin di dia, basta cu tin e respet pa e decisionnan cu ta ser tuma y esey tambe tabatin, mi coleganan cu a vota contra, semper nan a bisa tambe cu nan ta respeta e decision di parlamento y di Corte Supremo, ademas cu nan no tin ningun problema cu personanan di un orientacion sexual diferente. Nos tur ta para pa igual pa esey, e decisionnan ta cada ken tin cu tumele,” el a finalisa.