ORANJESTAD – Dilanti compania estatal di pais Aruba, Refineria di Aruba ( RdA ) e fraccion di AVP a bin hunto pa duna algun punto importante riba e situacion cu ta bibando riba nos isla.

E compania Refineria di Aruba (RdA), poni den operacion durante periodo di gabinete Mike Eman 2 despues di negociacion cu CITGO a logra acuerdonan importante. A cuminsa pone empleadonan den funcion den e refineria y na mes momento gobierno e tempo ey a crea y funda y pone den operacion e compania Refineria di Aruba (RdA) cu a bira doño di e refineria na San Nicolas y tambe e transshipment y esunnan encarga pa duna servicio como distribuido di combustibel na Aruba.

Lamentablemente para dilanti edificio di otro compania pa mustra pueblo cu actual gobierno di Evelyn Wever-Croes ta mal tratando. Esaki ta un compania cu e mesun gobierno aki ta kibrando, caminda e Minister di Finanzas a declara cu e lo ta esun encarga pa absorb’e e aumento di prijs di combustibel. Un aumento di 16 pa 20 cen pa liter cu ta practicamente imposibel!

Momento cu bo ta papia di 15 cen ta un suma di casi 20 miyon florin cu e compania aki hamas lo por absorba. Un decision tuma pa capricho, pa asina warda pa e manifestacion tuma luga y despues cu esaki pasa, nan sali y suta pueblo cu e aumento cu en realidad mester a tuma luga riba prijs di gasolin y diesel.

Na vanguardia di e pueblo, fraccion di AVP ta para dilanti portanan di e compania, un compania estatal y di sumo importancia como doño igual di e transshipment.

Den tur e conflicto aki tambe tin cu menciona cu e compania RdA ta den gara di sponsornan politico. En busca di deshaci e compania di su mercadeo propio y pas’e pa un compania di sponsor priva. Esaki ta algo cu nos lo no por permiti, caminda cu ta obvio lo ta algo pa “Friends & Family” apodera di esaki.

Tur esaki ta e motibo pakico no ta negociando. Un Prome Minister cu a bisa di a bay Merca y negocia cu autoridadnan mientras nunca nan a haci esey, mientras e compania doño di e refineria ta bou persecucion. Directiva, trahadonan persigui y na otro banda ta yena e luga cu friends & family den escasez di espacio den Gobierno pa motibo cu CFT ta nan tras.

Inaceptabel pa sigui tolera e hendenan aki den gobierno y tur nan fechorianan pasando mientras companianan importante ta sufri bou maneho mediocre. Miyones ta locual nan ta pretende cu e compania aki tin cu bay absorba bou promesanan falso y engañonan cu e gobierno actual aki ta haciendo.

Mike de Meza a bisa na final “Tuma nos palabra awe pasobra e ta bay pasa, nan ta bisa cu awe no ta bay tin aumento di gasolin cu diesel, pero despues di e marcha, pronto lo bo mira gobierno di Aruba lo anuncia y suta e pueblo cu aumento drastico y/o absurdo di tanto gasolin, kerosin y diesel. Aumento cu no por carga mas! Promesanan incumpli te dia di awe di baha awa y coriente cu 50%.

Manifestacion ta na su luga y p’esey nos ta pidi Pueblo pa join nos y vocifera abo tambe bo malcontento contra e gobierno aki cu ta un desaster total. No ta un secreto cu costo di bida ta halto y impagabel pa e pueblo aki, asina ex Minister Mike de Meza a termina bisando.