Mike de Meza, miembro di fraccion di AVP a mustra durante conferencia di prensa cu e inflacion causa pa Gabinete Wever-Croes, ta tumando limitenan hamas bisto anteriormente, hasta pio cu e tempo cu otro gobierno di MEP, esta gabinete Nelson Oduber a haci mesun cos entre 2001 pa 2009.

Medida riba custia di pueblo, ranca placa for di cartera di pueblo, cu e promesa cu cosnan lo drecha pero cu na final di cuenta ta pueblo a sali esun perhudica, De Meza a mustra y caminda solamente e ‘inner circle’ di e Ministernan actual, ta esunnan cu ta biba bon.

“Ta e hendenan aki so ta halando rosea bon, ta nan tin placa den cartera y por haci loke cu nan kier, ya cu ta placa cu a ranca di pueblo ta pagando e luho di e friends and family di gabinete Wever-Croes.

Ya caba ta conoci cu inflacion na Aruba ta yegando 5% y e situacion aki ta for di momento cu gobierno di coalicion a drenta dia 24 di november 2017 y manera cu aña 2018 a habri, por a mira cu tur prijs di productonan a cuminsa subi.

Casi por drenta un supermercado y mira con productonan ta zweef den aire ya cu ta subi e prijsnan ta subi ya cu e maneho di gabinete Wever-Croes, no tabatin otro solucion pa pueblo, cu ta esun di impone medida cu aumento di BBO y BAZV cu a crea un situacion sumamente dificil pa pueblo.

Recientemente nos lider di partido Mike Eman, a papia riba e aumento di costo di bida y mesora nos por a scucha miembronan di e fraccion di MEP cu ta sostene e gobierno aki, papia cu aparentemente Eman no ta compronde con inflacion ta traha.

Mi ta sigur cu Eman por duna e personanan aki les ta con inflacion realmente ta hinca den otro y con e ta traha anto kico e consecuencia cu esaki tin pa pueblo.

Un di sistemanan pa midi costo di bida, ta e costo socio-economico di cada famia na Aruba y ora cu nos drenta un supermercado ultimo tempo, tur hende cu nos topa eyden, ta bisa cu loke ta tumando luga ta di mas!

E situacion aki no por sigui asina y e gobierno aki ta desgraciando e pais aki, e gobierno aki ta creando pobresa y te matando e pueblo di Aruba.

Ora cu mira e cambionan cu tin manera prijs di cuminda segun informacion oficial di CBS, cu a surpasa riba un averahe mas di 12%, ta algo increibel, sigur ora cu nos mira e inflacion pa loke ta fruta cu a subi te surpasa 30% y nos por imagina kico e aumento aki ta haciendo cu pueblo.

Ora cu scucha con parlamentario di MEP ta purba den un estilo ‘academico’ splica con inflacion ta traha y kico su impacto ta riba economia bo ta puntra bo mes si ta na Aruba e personanan aki ta biba of nan ta bruha di tur e biahenan rond di mundo!

E realidad di e situacion nan por facilmente conoce dor di bay eyfo y cana anto scucha pueblo.

Drenta supermercado, bishita famianan, papia cu hendenan riba caya y mi ta garantisa nan cu e hendenan por splica nan den forma bon cla den idioma di pueblo kico ta e efectonan di inflacion, kico inflacion ta haciendo cu tata- y mamanan di famia.

Kico inflacion ta haci ora c’un mama tin cu manda su yiu scol, sin cu e por dune algo di come y ora cu e mesun yiu yega cas bek di scol, tampoco tin algo pa come.

Kico ta pasa ora c’un mama pa motibo di inflacion ta perde un cas cu e ta huur ya cu placa no ta yega pa cubri su debenan y esey ta consecuencianan di inflacion! Midi inflacion pa medio di cifra manera CBS a presenta ta un cos pero e dolor di pueblo ta e inflacion real!

Sinembargo ora cu bo kier consolida e efecto di e inflacion aki crea pa gabinete Wever-Croes, bay cana den pueblo, bay papia cu pueblo anto e ora nan lo bo haya un splicacion no academicamente pero bo ta haya e splicacion real di e efectonan desastroso di e inflacion cu e gobierno actual ta impone riba lomba di e pueblo Arubano.

Lo bo realisa seriedad di e impacto di e inflacion crea pa gobierno ora cu pueblo bisa bo cu cos no por sigui di e forma aki, ya cu gobierno ta desgraciando e pueblo cu el a priminti di sirbi.

Costo di bida aki no ta discrimina ningun hende, tampoco color politico y hasta ‘friends and family’ di gobierno. Solamente cu e diferencia ta cu gabinete Wever-Croes ta percurando pa ‘friends and family’ por tin suficiente entrada pa atende cu e aumento di costo di bida aki, mientras cu pa pueblo no tin nada y ta biba den un dolor grandi!

Un crisis total pueblo ta confrontando caminda e mesun gobierno aki cu ta papia cu pueblo mester come saludabel cu lo ta bon pa nan salud pero awendia bou di gabinete Wever-Croes come malo mes a bira impagabel!!!

Pa come malo awendia mes a bira imposibel pa logra bou di e gobierno aki ya cu no tin suficiente placa pa come regular, corda pa pensa pa bay come saludabel y e desaroyo aki ta cana man den man cu e aumento di gastonan di AZV y criminalidad cu ta sutando e pueblo humilde, De Meza a declara.