Diaranson anochi a tuma luga e eleccion di reina grandi y señora carnaval di Ritz Carlton Aruba. Un total di nuebe participante, cinco señora carnaval y cuater reina grandi, a presenta nan speech y show pa asina competi pa e titulo maximo di e reinanan di Ritz Carlton.
Pa prome biaha Ritz Carlton Aruba a organisa nan eleccion di reina y esaki a tuma luga den e ballroom di e hotel, cu tabata completamente yen. Familiar-, amistad- y coleganan di e candidatanan a acudi en grande pa demostra nan apoyo pa nan candidata.
Den ambos categoria a entrega e premionan pa e reina mas popular, queen QR (premio di votacion online), best costume, best speech, best show, finalistanan y por supuesto e reina.
Den categoria di señora carnaval e ganadora absoluto a keda den persona di Orelis Kelly, representando Casino Tables, ken a bay tambe cu e premio di best speech.
Pa loke ta categoria di reina grandi, e ganadora absoluto a keda den persona di Makayla Ruiz, representando Meetings & Special Events. Ruiz a logra bay cu e premionan di mas popular, queen QR, best speech, best show y best costume.
Tsunami tabata encarga cu e entretenimiento y tur persona cu tabata den e ballroom a gosa di un ambiente carnavalesco desde principio te na ultimo momento.
Ta bunita pa remarca cu e tema di reciclahe a resalta den e costumenan di e candidatanan y creatividad tabata font and center den esakinan.
