Recientemente Bon Dia Aruba a combersa cu parlamentario y lider di partido ACCION21, Miguel Mansur, tocante entre otro e iniciativa di ley cu el a entrega na presidente di parlamento pa cambia leynan electoral di Aruba y su preocupacion tocante posibel influencia politico den Parlamento Hubenil.

Recientemente riba rednan social, despues di e debate nacional cu a tuma luga siman pasa, tabatin algun conmocion pa e tema di influencia politico den Parlamento Hubenil, preocupacion cu Mansur a trece dilanti durante debate y cu lider di partido MEP, Evelyn Wever-Croes a critica publicamente.

Mansur a splica kico e situacion tabata y loke a conduci na un critica di parti di Wever-Croes contra dje y Mansur su contesta riba e critica. Segun e parlamentario a indica, durante e debate nacional tabatin un pregunta dirigi na e candidatonan cu a pidi nan scoge un programa di un otro partido cu nan ta sostene y kere aden y cu nan lo kier continua.

Den e caso aki Mansur a scoge Parlamento Hubenil, un programa desaroya mas o menos 20 aña pasa cu ta duna oportunidad na hobennan desaroya liderazgo, conoce mas di politica, tuma un interes mas grandi den politica y cu ta yuda crea e lidernan di futuro.

El a remarca cu semper Parlamento Hubenil mester ta, y semper a ser manteni, separa for di politica. El a subraya cu unabes partidonan politico cuminsa influencia of infiltra Parlamento Hubenil, ta perhudica e continuacion, efectividad y eficacia di e organo.

Durante e debate, Mansur a trece dilanti cu ta preocupa cu por ehempel dos trahado di un cierto partido, den caso aki partido MEP, a bira miembro di directiva di Parlamento Hubenil, locual el a resalta no mag. El a splica cu esey ta un afiliacion directo cu un partido cu por mal usa e posicion.

El a indica cu si permiti esaki sigui, despues tur partido kier pone nan trahadonan, fractiemedewerkers den e directiva, locual lo conduci na un Parlamento Hubenil politisa.

El a agrega cu tambe a wak diferente miembro di Parlamento Hubenil ta forma parti di un hala hubenil di un partido. Mansur a subraya cu esey eigenlijk tampoco ta permiti pasobra e ta asociacion politico den Parlamento Hubenil.

El a sigui splica cu den pasado si un miembro tabata kier afilia of asocia su mes na un partido politico of e hala hubenil di un partido, e miembro ta tuma su retiro di Parlamento Hubenil.

“Nos a wak den e ultimo aña pa dos aña un infiltracion di politica den Parlamento Hubenil y loke mi a trece dilanti ta cu mi kier pa e organisacion sigui florece. Mi sa cu nan tin plannan hopi grandi, por ehempel pa expande eleccion pa Parlamento Hubenil pa inclui henter e teritorio di Aruba, cu muchanan di tur scol por participa. Mi ta kere e ta un instituto cu nos por sigui desaroya pa crea lidernan di futuro pa stimula liderazgo, interes den politica, pero pa e ta exitoso e mester keda liber di influencia politico,” el a enfatisa.

Prome minister demisionario a publica siguiente dia un comunicado den cual el a critica e parlamentario pa esaki. Mansur a subraya cu ademas el a publica e critica riba pagina di Facebook di Gabinete Wever-Croes, pagina di gobierno, y cu usa pagina of plataforma di gobierno pa ataca un contrincante politico ta cualifica como censura, cual ta un tipo di corupcion.

E parlamentario a enfatisa cu Wever-Croes ta liber como lider di partido MEP pa haci atake riba su pagina, pero no a base di recurso of pagina di gobierno cu pueblo di Aruba ta financia. “Esaki ta gewoon e politica sushi cu nos a custuma di mira di MEP y Sra. Wever-Croes. Mi a contest’e den e mesun tono den un comunicado di prensa. Nunca mi ta gusta yega na e nivelnan ey, pero tin biaha esey ta e unico idioma cu cierto partidonan ta compronde,” el a agrega.

Voto pa Arubiano den exterior

Den luna di october, Mansur a entrega na presidente di Parlamento di Aruba un iniciativa di ley cu tin como meta modernisa e leynan electoral di Aruba. Articulo III.5.1 di Constitucion di Aruba ta bisa cu Arubiano residencia na Aruba por eherce nan derecho di voto. Bon Dia Aruba a puntra e parlamentario con ta bay haci cambio na ley mirando kico e Constitucion ta bisa.

El a splica cu su persona tambe a haci e pregunta inicial na e abogadonan legislativo si no lo mester cambia constitucion pa esey. El a sigui splica cu e abogadonan legislativo a indica cu e Constitucion ta establece un minimo, pero semper parlamento of gobierno por legisla mas leu. Pues Constitucion ta rekeri cu por lo menos e Arubianonan residencia na Aruba tin derecho di voto, pero no ta bisa cu otro hendenan no por tin derecho di voto.

Mansur a splica cu pa haci e cambionan aki via landsverordening mester di 11 voto, un mayoria simpel y pa hancr’e den Constitucion mester di un mayoria mas grandi, y p’esey a dicidi pa cuminsa den un landsverordening pasobra e ta mas facil pa pasa, pero eventualmente lo kier cambi’e den Constitucion tambe.

Bon Dia Aruba a puntra Mansur si e cambio aki no ta trece un influencia desproporcional teniendo na cuenta cu personanan cu no ta biba na Aruba no lo sinti e efectonan di e decisionnan tuma na Aruba.

El a splica cu contrario na con e proceso ta cana na Aruba, caminda tur persona di nacionalidad Hulandes riba 18 aña, residencia na Aruba, ta ricibi su stembiljet automaticamente. Pa Arubianonan den exterior e ta bay ta diferente. El a indica cu Arubianonan den exterior mester registra, nan mester mustra un interes pa eherce nan derecho di voto.

El a remarca cu ta importante pa realisa e cambio aki, pasobra mayoria di pais na mundo ta ofrece nan ciudadanonan den exterior e derecho di voto y semper tin Arubianonan den exterior cu ta keda lasonan fuerte cu nan pais.

“Nos ta biba den un mundo globalisa, kiermen pa trabao, relacion, pa estudio bo ta haya bo mes pafo di bo pais. Te hasta si bo keda biba un tempo afo, esey no kiermen cu bo a perde bo lasonan cu bo pais, dus hopi di nos expatriadonan ta cobra pensioen, hopi di nan cu lasonan familiar, hopi tin propiedad dus ta paga grondbelasting y nan tin un interes den e futuro di e pais,” el a subraya.

Pa loke ta trata e parti di logistica di con lo haci posibel cu Arubianonan den exterior por eherce nan derecho di voto, Mansur a splica cu e ley ta crea un stembureau pafo di Aruba. El a indica cu lo trata Hulanda diferente cu e otro paisnan simplemente pasobra tin mas Arubiano ta biba eynan. Na Hulanda e proceso lo bay via Arubahuis. E votador lo ricibi e stembiljet sea via post of e-mail, cual ta mas barata, y nan lo mester debolbe e stembiljet per post of si nan ta den area di Den Haag por hib’e personal.

El a sigui splica cu na otro paisnan lo haci mescos cu Hulanda mes ta haci. E votadornan lo ricibi e stembiljet via e-mail y nan mester mand’e per post pa e embahada Hulandes. El a resalta cu pafo di Hulanda ta e minister president di Aruba, cu ta esun cu tin autoridad riba e embahadanan den Reino rond di mundo, lo ta encarga cu mantene un registro di Arubianonan cu a expresa un interes di vota na nan respectivo pais di residencia. El a remarca cu un biaha so mester registra, pero despues ta responsabilidad di e votador pa mantene su contactonan al dia.