Den ultimo dianan, Ley di Reino pa Supervision Financiero ta keda un topico constante mirando cu pa dia 10 di october, Aruba tin cu paga back e sosten di likides cu a ricibi durante e crisis di Covid-19, aunke gobierno Hulandes ta demisionario.
Den esaki, Hulanda ta insisti riba e rekisito pa e Ley di Reino pa Supervision Financiero na Aruba drenta na vigor, despues di cual por refinancia e debe di sosten di likides di tempo di pandemia cu un tasa di interes faborabel. Prome minister, Evelyn Wever-Croes a indica cu Den Haag kier un contesta prome cu dia 1 di september.
E fecha pa Aruba paga back su debe, si no logra refinanciamento, ta poni pa dia 10 di october. E obstaculo riba e caminda aki ta Parlamento di Aruba, cu ta kere cu e Landsverordening pa supervision financiero ta suficiente pa cumpli cu e tarea di supervision. Sinembargo, Hulanda no ta di acuerdo pasobra den caso di un ley local, Hulanda no lo tin nada di bisa.
Segun prome minister, gobierno di Aruba ta trahando riba su propio input pa e concepto di e Ley di Reino pa Supervision Financiero, bisando cu nan ta poniendo esaki riba papel pa mand’e.
Mirando cu ta falta menos cu tres luna, y manera prome minister a indica, cu e obstaculo pa esaki ta parlamento, a puntra lider di fraccion ACCION21 con e situacion ta na e momentonan aki tocante esaki. El a menciona cu su partido ACCION21, conhuntamente cu MAS, y Ryçond Santos do Nascemento ken ta independiente igualmente cu Gerlien Croes, ta na fabor di e ley di supervision aki.
Partidonan cu ta contra esaki ta MEP, AVP y RAIZ
Pa loke ta trata MEP, Mansur a sigura cu nan kier haya contesta riba e preguntanan haci pa parlamento. E preguntanan mester haya contesta pa gobierno di Hulanda hunto cu gobierno di Aruba, pero no tin consenso.
Mansur ta bisa cu “ta un locura e hecho di no acepta e ley financiero aki. Si nos acepta e rijkswet nos ta logra financia rond di 3% na luga di 7%. Esey ta scapa nos 32 miyon florin pa aña durante 20 aña, dus 640 miyon florin.”
Di mesun manera, el a splica cu “e landsverordening no ta traha. Na 2022 Parlamento a aproba un presupuesto cu un deficit original di 227 miyon den violacion di e landsverordening. CAft a recomenda un aanwijzing y Parlamento mester a cambia e presupuesto. Evelyn Wever-Croes mes tabata kier traha un rijkswet tempo e tabata den oposicion na 2014.”
Ademas, Mansur ta di opinion cu “tin mas cu suficiente evidencia cu Parlamento no por carga su responsabilidad di controla gobierno y sigura finanzas publico sostenibel durante hopi aña, dus e rijkswet ta un siguransa cu pueblo su placa ta wordo bon maneha. Politicamente MEP tin miedo di pasa e rijkswet, pasobra AVP lo ataca nan como entreguista etc., dus pueblo ta perde. E politica entre MEP-AVP ta tuma precedencia riba interes nacional,” el a finalisa.
Ademas di gobierno, Tweede Kamer na Hulanda tambe ta poniendo hopi enfasis riba e Ley di Reino pa Supervision Financiero, particularmente despues cu parlamentarionan Kamminga y Van den Berg a entrega un mocion pa gobierno Hulandes no refinancia e debe di Aruba si no ta cumpli cu e condicion aki.
Den Tweede Kamer di Parlamento Hulandes a tuma lugar luna pasa un debate pa trata algun mocion di diferente parlamentario encuanto e situacion na e islanan di Reino Hulandes den Caribe. Pa Aruba tabata di special importancia un mocion di Sra. Roelien Kamminga (VVD) y Joba van den Berg (CDA), cu tabata un accion pa sigura cu Aruba lo no haya extension di e prestamo haci durante e crisis di Covid-19 a base di condicion faborabel, interes abao, si gobierno di Aruba no ta dispuesto pa acepta e ley di Reino di supervision financiero.
Tambe den e mocion ta pidi gobierno Hulandes pa maneha un interes mas halto segun mercado pa e prestamo tanten no tin un ley di Reino pa supervision financiero vigente, “y si den e periodo venidero lo tin paso significativo tuma den direccion di e entrada na vigor di tal, refinancia e prestamonan solamente a corto plaso cu un porcentahe di interes cu ta pas cu e situacion cu ta en todo caso mas halto cu e interes bao di condicion faborabel.”
