Parlamento di Aruba su ‘zittingsjaar’ 2021/2022 a termina y mirando e data den cuadro cu esaki, tambe analisando entre otro e cantidad di preguntanan cu a wordo haci durante e periodo parlamentario aki, ta resalta cu Parlamentario di fraccion Accion21, sr. Miguel Mansur, ta e parlamentario cu mas pregunta a haci, estableciendo un record nobo pa Aruba, y Minister di Finansas sra. Xiomara Maduro ta e mandatario cu menos pregunta a contesta durante e periodo aki.

Parlamento di Aruba su aña parlamentario pa loke ta periodo di 14 september 2021, te cu 12 september 2022 awor a yega su final y por constata un periodo parlamentario bastante druk pero sigur interesante pa pais Aruba ora cu mira e data. Staten a haya 1320 ‘Ingekomen Stukken’, a pasa door di 32 reunion publico y 32 reunion di Centrale Commissie, cu 17 Bijeenkomsten. Pa loke ta e cantidad di preguntanan por escrito haci na gobierno, Parlamentario Miguel Mansur di Accion 21 ta esun cu mas a haci pregunta (426) sigui pa Aquanette Gunn (174) di fraccion MAS. Aki por subraya cu Parlamentario Miguel Mansur a logra na kibra record den preguntanan haci por escrito durante un aña parlamentario. E ultimo record tabata 308 pregunta por escrito, haci pa Marlon Sneek (AVP) durante aña parlamentario 2019/2020.

Un otro parti interesante ta e preguntanan cu a wordo haci na nos ministernan, pero sigur e cantidad di esakinan cu a wordo contesta. Por mira por ehempel esun cu mas pregunta a haya tabata Prome Minister Evelyn Wever-Croes (266) anto di esakinan el a contesta 203. Esaki ta sigui pa Minister Glenbert Croes cu a wordo haci 209 pregunta, y a contesta 97 di nan. Minister Xiomara Maduro a wordo haci 80 pregunta, anto a contesta unicamente 5 pregunta, haciendo e esun cu menos pregunta a contesta durante e periodo aki segun e datos. “Asina mes por mira basta, casi mita di e preguntanan cu no a haya contesta, Minister di Finansas por ehempel ta esun pio den contesta pregunta, e ta un data sigur hopi interesante,” sr. Mansur ta comenta.

“E reto primordial cu nos tin ta pa stop di ta un stempel parlement. Pa realmente lanta para y bisa cu esaki ta loke nos ta pensa y para tras di dje,” sr. Mansur ta expresa. Hopi biaha ta sosode den comision cu te hasta parlamentarionan di coalicion ta trece algo dilanti pero ora di vota, nan ta cambia di idea. Accion21 ta traha pa wak parlamento para riba su principionan y demanda gobierno introduci finansas publico sostenibel, specialmente cu nos ta drentando un periodo di incertidumbre na un nivel mundial. Mansur: “Mas cu tur cos ta hopi importante pa nos funciona debidamente.”

E Parlamentario di Accion21 a bolbe vocifera su deseo pa Parlamento duna ehempel y baha su gastonan. Paisnan grandi manera Uruguay ta manda un solo miembro di coalicion y un solo miembro di oposicion participa den comicionnan permanente di Parlatino. Segun Mansur si reduci participacion den Parlatino pa un solo comicion pa Parlamentario lo facilita miho contribucion y baha gastonan di biahe. Na IPKO tambe, Corsou y Sint Maarten ta manda unicamente lidernan di fraccion mientras Aruba ta yega cu un delegacion di 11 miembro, algun biaha mas grandi cu e delegacion Hulandes mes. Esey segun Mansur ta ridiculo y ta duna balor na loke Parlamento ta wordo tilda di dje esta “snoepreisjes.” Miembronan di mesun fraccion semper tin un standpunt comun dus no tin balor di manda mas cu un Parlamentario di mesun partido na e reunionnan cu ta sosode dos biaha pa aña. Si sigui ehempel di Corsou y Sint Maarten y limita delegacion di Aruba na lidernan di fraccion y Presidente di Parlamento lo por baha gastonan di biahe mas ainda y duna ehempel na gobierno. Den pasado sr. Mansur a pidi detaye specifico di gastonan di biahe di Parlamento y a ser nenga, ningun di e otro cuatro partidonan no a bay di acuerdo pa e parlamentario ricibi e cifranan algo cu sigur no ta cuadra cu transparencia y sigur tin luga pa mehoracion.