Den un entrevista exclusivo cu Bon Dia Aruba, Miguel Mansur a presenta su partido ‘Futuro Nobo’ pa asina duna di conoce kico ta nan plan, con lo dedica nan mes na politica den proximo eleccion y asina trece un cambio pa Aruba.

Mansur a dicidi di dedica tur su tempo na politica aworaki, manera el a informa. E ta presidente di un compania na Florida, cual el a laga sa cu el a pasa su posicion na otro hende den tempo aki pa por dedica su mes na e idea cu e tabatin di crea un partido nobo, y cu a cuminsa na luna di juli ora el a publica un articulo. A base di esey el a wordo acerca pa diferente hende pa considera su mes como un candidato, ya cu el a sigura cu esaki ta algo cu e ta gusta y ta su pasion.

Na luna di augustus el a cuminsa papia cu candidatonan pa wak si tin algun interes den un partido nobo, si e por haya personanan cualifica cu e ta kere cu lo por aporta na e futuro di e pais pa subi riba lista, y mediante un investigacion cu el a haci, el a haya un resultado hopi positivo y afirmativo pa su persona.

Na september a dicidi cu lo lanta un partido nobo y el a cuminsa tuma pasonan pa bin bek na Aruba pa por consolida su partido y cuminsa campaña pa eleccionnan di proximo aña.

Mansur a conta cu aworaki nan ta trahando riba statuut y cu den proximo simannan lo registra e partido. Tambe el a sigura cu ta posibel cu e nomber di partido lo por cambia y asina evita confusion, pero te ainda e ta bao nomber di Futuro Nobo.

Na e momentonan aki, Mansur a informa cu e partido tin entre 10 cu 15 persona cu ta bay riba lista. Pero esey ainda ta den deliberacion, pa motibo cu drenta den un partido y cuminsa haci campaña ta costa tempo y esfuerso.

Pa un persona por bira candidato di e partido, na prome luga e persona su vision mester ta alinea cu esun di e partido. “Nos ta e prome partido liberal na Aruba y mas cu esey, nos ta contra politica tradicional, contra e corupcion y mal maneho.” P’esey nan ta busca hendenan cualifica y cu no ta mancha pa politica tradicional, ni cu vinculo den casonan di corupcion of probecho di sector publico.

Loke nan kier propone pa cambia e politica na Aruba ta basicamente cosnan cu ya caba nan ta papiando di dje, por ehemplo,limitenan di termino den loke nan kier cambia den structura di gobierno. Pero mas cu tur cos el a señala cu nan kier imagina nan lasonan cu Hulanda, sea den contractnan di 7 pa 10 aña, of pa bin cu un consulta di pueblo pa wak si kier bin cu cambionan structural, kisas si kier un gobierno mas chikito.

“Nos ta haya cu e pais ta wordo goberna y ta funciona a base di leynan cu a wordo haci despues di Segundo Guera Mundial. Nos ta den siglo 21 cu leynan di siglo 20”, Mansur a specifica.

Di esaki, el a comenta cu nan kier haci un inventario di kico ta funcionando y kico no. Pero realmente nan kier adapta e leynan di siglo pasa pa e futuro y e retonan di e siglo aki. “P’esey nos mester hende cu ta abierto pa por re-imagina nos structura local y nos structura den reino”, Mansur a declara.

Tocante area economico, Mansur a bisa cu ta algo cu e ta haya hopi preocupante. Aworaki comunidad a scucha cu gobierno tin acuerdo cu Hulanda y cu ta algo hopi bon pa stabilisa e finanzas, pero nan a gasta tres luna den negociacion. Manera el a relata, el a papia desde algun siman atras cu hopi hende cu tin companianan chikito of grandi, y e mayoria di nan a bisa cu nan ta operando na 20% of menos di nan capacidad di loke normalmente nan ta haci. “Mi no ta wak cu gobierno ta tumando e pasonan pa cuminsa salvaguardia nos negoshinan y yuda e hendenan cu no ta hayando loke nan mester pa nan y pa nan famia. Hopi politica partidario ta tumando luga”, el a bisa.

Den e parti medico, Mansur a afirma cu ya sa caba kico e daño ta bay ta si un otro ola di Covid-19 ta bin, door cu na e momentonan aki esey ta tumando luga na Europa. Di loke ta trata turismo, te ainda no a bin cu un plan pa enfrenta e retonan economico cu awor ta bay cuminsa a causa di caida di turismo, cu a resulta mas severo y mas prolonga cu por a kere.

Mansur a expresa cu su partido tin plannan pa hiba e pais dilanti, pa traha cu Hulanda y trece e debenan na un nivel cu lo ta mas manehabel. Pero “desafortunadamente aworaki mi kier wak pa tur hende pone politica na un banda y cuminsa enfoca riba e problema actual. Kico por haci pa comerciantenan, pa salvaguardia nan negoshi”.

Si por ehemplo turismo no ta bay recupera te otro aña, Mansur a declara cu nan kier wak ki pasonan gobierno lo tuma den sistema bancario pa keda cu likides y yuda comerciantenan pa nan no perde nan negoshi. Door cu na Aruba tin hopi hende cu tin un tipo di pobresa nobo, “esun cu tin un cas of auto nobo, pero como no tin turista, nan no tin entrada y nan no por paga nan debe y servicionan”.

Ademas, el a trece dilanti cu faltando algun luna pa eleccion, si nada no cambia na urna electoral e aña aki, nada lo cambia e pais tampoco. Tin hopi hende den comunidad cu ta harta di corupcion, di mal maneho y e peliger ta cu tin hende cu a cuminsa perde speransa di tin un diferente sistema di gobernacion. “Bo mester acepta esey y esey ta hopi, hopi peligroso,” pa motibo cu por crea un apatia cu politica. Loke e partido realmente kier, segun Mansur a manifesta, ta pa tin un sociedad mas participatorio.

Bon Dia Aruba a puntra con nan ta pensa cu nan por haya votadonan cu realmente tin interes pa vota pa Futuro Nobo. Mansur a splica cu nan kier mustra e experiencia di ultimo partidonan den gobierno y wak e resultado: “Un di e pais cu ta mas endeuda na mundo.” Nan kier purba di convence cu esey no mester sigui asina, tin otro caminda cu no ta bay bin cu promesanan falso.

Un di e promesanan cu tambe a wordo priminti den eleccionnan pasa tabata trata tocante amnistia pa stranhero, pero esey no a wordo cumpli. Di esaki Mansur a bisa cu nan plan di migracion no ta cla ainda. “Nos tur na Aruba ta stranhero y nos tur ta forma parti esencial di sociedad, pero esaki ta un tema mas complica pa via di situacion economico. Inmigracion ta un di e retonan di nos epoca y ta e resultado di problemanan economico cu ta forsa hende pa bandona nan pais y nan famia y busca un miho futuro”, el a sigura.

Ta tuma no solamente interes di inmigrantenan, pero tambe residentenan local y con por haya un manera pa balansa e deseo di henter e comunidad, Mansur a finalisa.