Miguel Mansur di partido Accion 21: A haci basta preguntanan pa ministernan tocante presupuesto di aña 2021

Ayera a wordo trata presupuesto di aña 2021 na Parlamento di Aruba, den e cual e parlamentario di partido Accion 21 Miguel Mansur a trece dilanti casi 100 pregunta dirigi na prome minister y otro ministronan demisionario.

Den sesion aki na parlamento por a mira un poco bashi ya cu parlamentarionan di otro partido AVP no tabata presente, pero di mesun manera e tratamento di presupuesto di e aña aki a continua y a tarda basta oranan cu preguntanan di diferente parlamentarionan y contestanan di diferente ministernan.

Entre e preguntanan cu Mansur a dirigi na prome minister demisionario Evelyn Wever-Croes a destaca como por ehemplo, con a para cu e desaroyo di COHO encuanto Aruba su asimilacion den nos leynan pa Supervision Financiero, ademas el a puntra cu mirando cu prestamo di Hulandes lo caduca hunto cu  e acuerdo na 2029 si Aruba cumpli cu Articulo 15 RAft, si prome minister por  informa parlamento con gobierno ta premira atende cu e terminacion di prestamo na tarifa faborabel mientras ta baha e debe na 50% di PIB.

Asina mes, minister demisionario di Salud Dangui Oduber a trece dilanti un di e preguntanan cu Mansur a haci tocante con leu gobierno ta cu e ley pa aumenta e edad di pension pa lo cual a contesta “Mi no sa di unda sr Mansur ta saca e informacion aki cu gobierno lo tabatin e intencion di aumenta edad di pension, gobierno demisionario y esun cu tabata prome no tabatin e intencion di aumenta edad di pension, awor si sr Mansur tin e intencion asina ferviente pa aumenta edad di pension, mi ta kere e por presenta e concepto di ley aki pa parlamento pa wak si nan por cumpli cu su deseo di aumenta edad di pension na 66, 67 of 68, pero e intencion t’ey di Mansur pa aumenta edad di pension” Oduber a declara.

Asina mes, Oduber a sugeri Mansur pa asina lesa un biaha mas y compronde cu un investigacion mester wordo haci pa wak si aumenta edad di pension na 66 ta uno realistico, “mi ta sugeri pa bo no mal informa pueblo cosnan cu bo no ta compronde of bo ta interpreta diferente”, el a bisa.

Den un intervencion di minister demisionario di Finansa, Cultura y Asuntonan Economico Xiomara Maduro, el a splica na Mansur cu tambe a haci e pregunta di pakico presupuesto di aña 2021 a tarda 11 luna pa motibo cu tabatin un pandemia na henter mundo y cu hopi hende no ta consciente kico un pandemia ta y kico ta e rol y vulnerabilidad di un pais como Aruba den esaki y ta p’esey cu no por a wordo entrega un presupuesto prome cu september di e aña aki.

Un otro pregunta pa minister Maduro tabata con lo aumenta entrada y percura e ora ey pa cu e parti di landspakkete sin cu esey lo haci daño, con ta bay haci pa esaki, Maduro a contesta cu e gobierno saliente a traha cu mas di 250 stakeholders riba e hecho di un plan pa asina por acelera economia di pais Aruba, aparte di esaki tambe tin un reforma fiscal pa no solamente crea un espacio extra sino tambe pa haci e procesonan mas eficiente.

“Ta un cantidad di cosnan y procesonan cu a cuminsa y cosnan cu mester a para pa pandemia, otronan como por ehemplo plan pa reposiciona Aruba, ta cosnan cu den pandemia a sali pa asina e ora ey por traha riba dje”, Maduro a indica.

Asina mes, el a sigura cu nan tambe ta trahando pa por cambia tambe e sistema di BBO, pero mester tin pasenshi, perseverencia pa e cosnan por cana, “e pandemia a pone tur hende para y aworaki nos tin cu sigui y bo ta wak cu economia a bini”, el a bisa.

Tambe a wordo treci dilanti e pregunta pa minister demisionario di Husticia Andin Bikker di cuanto ta e bezzetting optimal pa personal di Cuerpo di Polis pa asina por bisa cu e departamento aki ta completo, el a contesta cu aproximadamente e cantidad optimal di trahadonan ta alrededor di mas di 700 persona.