Nos a tuma nota di un comunicado di prensa di Minister Arends caminda e ta lansa tur sorto di atake riba mi persona. Curiosamente ta e mesun atakenan cu dos miembro di AVP, Arthur Dowers y Gerlien Croes, a yega di vocifera riba Enfoke, mi lo a sikiera aprecia un tiki originalidad.

Esencia di Ursell su mensahe ta cu mi ta un politico tradicional cu bachi nobo. Minister Arends kier a hunga gran guy durante tratamento ilegal di presupuesto 2023, sin un conseho valido di RvA, y pensa cu si e reta mi persona mi lo bandona nos protesta y core drenta sala y pidi un persoonlijk feit. Aparentemente Minister Arends ta kere cu tur hende ta sufri di e mesun falta di principio cu su persona y partido.

Durante tratamento di ley di screening nos a propone un amienda cu lo a duna lidernan di oposicion acceso na resultado di screening y RAIZ a vota contra. Un di e motibonan cu a ser vocifera ta cu e filesnan no por sali fe oficina di gobernador, pero esey a resulta di no ta e caso. Mi ta contra personanan no politico wordo envolvi den e bay bin simplemente paso nan ta casa/pareha di un Minister por ehempel, esey ta un brug cu ami no lo crusa pero sigur lo keda refleha den un screening completo.

Manera mi a yega di trece dilanti cu Minister Arends riba mas cu un ocasion, e politica nobo cu ami ta kere aden ta a base di honestidad, cerca mi, “what you see is what you get.” Mi ta condena fuertemente un partido cu ta campaña pa cambio y resulta di ta un fraude pa su votadonan. Cuminsando cu un deal di 20 aña pa LNG mientras bo a campaña pa energia alternativo, pa no papia mes cu un compania cu a bin pa habri refineria ta caba cu un contract pa bende WEB gas. Durante campaña y den debate bo ta proclama boso plan di “mergers and acquisitions” pa reduci cantidad di personal di aparato publico pero una bes den gobierno ta sufri di amnesia selectivo.

Mi ta condena un partido cu a campaña pa integridad pero den Ministerraad y Parlamento ta acepta y exonera mas di AWG 7,8 miyon di fraude den FASE, mas cu 100 miyon paga di mas den loonsubsidie, tapamento di corupcion na Arubahuis, fraude den vacunacion etc. Mi ta condena un partido cu ta campaña contra friends and family y una bes den gobierno y parlamento ta practica e mesun nepotismo cu nan votadonan a rechasa. Mi ta condena cu na momentonan crucial cu ta toca futuro di nos pais pa e proximo decadanan abo y bo coleganan a vota pa proteha boso trabao na luga di pueblo di Aruba.

Berdad e politica nobo di Accion 21 ta hopi diferente cu esun di RAIZ, nos NO TA DEFRAUDA nos votadonan. Nos ta kere den fortalece parlamento cu tur e hermentnan necesario pa haci su trabao, incluyendo conseho di RvA y CFT ora ta trata e ley mas importante di pais Aruba. Nos no ta kere den rechasa mas cu 50 amienda y mocion simplemente paso nan a origina di oposicion. Durante tratamento di presupuesto 2022 tabata tin mas cu 40 mocion y amienda, durante tratamento di presupuesto 2023 sin oposicion tin net 5 mocion.

Nos no ta hambra pa poder cu nos ta tira un oportunidad unico pa cambia e sistema afo pa core bay sinta cu dos Minister y alabes permitiendo e partido mas grandi di coalicion sinta cu 6 minister durante crisis financiero. No ban papia mes cu pa prome biaha den historia di Aruba gobierno tin menos voto cu oposicion, esey no ta e balornan y principionan cu Accion 21 y mi persona ta kere aden.

E grandesa di democracia ta cu ‘tarde o temprano’ pueblo lo vota. Na proximo eleccion pueblo lo duna bo persona y ami un veredicto riba e trabao cu nos a haci den representa nan, ban wak ken lo bolbe.