Den un carta dirigi na minister president, Evelyn Wever-Croes, parlamentario Miguel Mansur (ACCION21) a manda un total di bintidos (22) pregunta y ta pidi gobierno presenta algun documento esencial den parlamento. Un di esakinan sigur ta e cassatie advies cu a motiva gobierno bay Hoge Raad contra e veredicto di HOF, ta importante pa mira esaki. Adicionalmente, un total di e gastonan entama pa land Aruba relaciona cu bay den cassatie contra e veredicto di HOF di 6 di december, 2022.

Ki tempo por spera cambio di ley?
 Mirando cu minister-president ta encarga cu legislacion di gobierno y te cu awor practica di gobierno ta pa modifica ley pa nan ta den concordancia cu veredicto di corte, manera a pasa recientemente pa kiesverordening. Aunke ningun cambio di ley ta necesario pa matrimonio di mesun sexo drenta na vigor, ta practica di e minister encarga cu legislacion pa adapta nos leynan pa nan ta den concordancia cu hurisprudencia.

ACCION21 kier sa si gobierno a pidi Directie Wetgeving en Juridische Zaken (DWJZ) cuminsa prepara cambio na nos leynan pa trece nan den concordancia cu e cassatie arrest di 12 di juli, 2024 pa loke ta matrimonio di mesun sexo. Si e contesta ta afirmativo, ta pidi si minister por comparti cu parlamento ki fecha esey a tuma luga. Si no ta asina, ta pidi minister-president pa splica pakico esaki ainda no a tuma luga y ki fecha ta premira cu lo instrui DWJZ pa traha riba e cambionan. Pa ACCION21 ta importante pa sa ki tempo parlamento por spera e cambionan di ley pa incorpora e cassatie arrest den nos leynan, luna y aña.

Tres luna di espera pa haya cita
 Despues di e cassatie arrest cual a habri matrimonio pa pareha di mesun sexo, ACCION21 a bin compronde cu tin tres luna di espera pa un afspraak di ondertrouw na Censo. Mirando cu e cantidad di matrimonio ta bahando den ultimo añanan, lo ta interesante pa scucha minister splica pakico mester warda asina hopi pa un cita di ondertrouw. E fraccion lo kier sa cua ta e tempo di espera actual pa e diferente respectivo servicionan di Censo, y si tin plan pa reduci e tempo di espera pa menos di un luna pa e respectivo servicionan.

Directie wetgeving en Juridische Zaken (DWJZ)

A yega na conocemento di ACCION21 cu director di DWJZ a entrega su retiro. Den cuadro cu esaki, e fraccion kier sa si minister por comparti cu parlamento cuanto ‘wetgevingsjurist’ tin actualmente na DWJZ excluyendo e director. Dificilmente DWJZ por haya un ‘wetgevingsjurist’ nobo pasobra e limitacion riba salario den sector publico ta abao. ACCION21 ta pidi gobierno si por comparti cu parlamento si di berdad esaki ta e caso, y ki solucion gobierno tin pa e problema. Ta esencial tambe pa sa cuanto ‘wetgevingsjurist’ DWJZ lo mester conta cu ne ora ta na capacidad completo, y ki capacidad DWJZ tin pa skirbi of modifica leynan, cuanto ley of cambio di ley nan ta produciendo pa luna por ehempel.

Parlamentario Mansur tambe ta puntra ki tempo di espera ta actualmente pa un minister cu a pidi asistencia den desaroya un concepto di ley of cambio di ley. A pidi minister-president tambe si por comparti cu parlamento con peticion pa asistencia den wetgeving ta priorisa, mirando cu parlamento tambe tin por lo menos un concepto na DWJZ. Ta importante pa sa tambe ki tempo e mandatario ta spera cu lo elimina e achterstand cu tin na DWJZ.

Otro asunto importante
 Relaciona cu otro asuntonan importante y preguntanan dirigi na minister-president, ACCION21 ta compronde cu hefenan di departamento tin derecho actualmente riba un toelage di 25% di nan salario, plus un auto y otro beneficionan.

Den cuadro cu esaki, ta puntra minister-president si por comparti cu parlamento cuanto hefe di departamento tin, y nan respectivo departamento. Si tin hefe di departamento cu ta ricibi mas cu 25% toelage, auto etc., pues un nivel di beneficio superior na e otro hefe di departamentonan? Si e contesta ta afirmativo, ta pidi minister-president si por comparti cu parlamento ken nan ta, pakico y cuanto nan nivel di beneficio adicional ta.

Proximo eleccion

Na Corsou a keda anuncia fecha di proximo eleccion na 2025. ACCION21 kier sa ki tempo minister-president lo anuncia fecha di proximo eleccion na 2025 si gobierno sinta ful su termino. Tambe, ki factornan lo influencia minister su decision pa establece fecha di e proximo eleccion, y con nan lo pisa contra otro.

Mercado liber

Finalmente, riba loke ta e tema di mercadonan liber; competencia husto y acceso facil ta importante pa economia crece. Competencia ta e miho garantia pa eficiencia y prijsnan competitivo, como tambe prosperidad. ACCION21 ta puntra minister-president si por comparti cu parlamento un inventario di cuanto industria of mercado actualmente ta limita pa cantidad di permiso disponibel asina distorcionando mercado liber.