Si tin un cos cu a bira claro despues cu Minister di Finansas, sra. Xiomara Maduro, a firma e leenovereenkomst ta cu nos mester di cambio urgentemente. Gobierno y un mayoria den parlamento (MEP, RAIZ y AVP) a opta pa un interes di 6,9% riba e 915,5 miyon cu Aruba a fia fe Hulanda durante pandemia.

E diferencia entre e interes cu Aruba a acepta y e interes preferencial cu Hulanda a ofrece si acepta e RAft ta mas cu 365 miyon florin. Esey ta traduci na AFL 9.407,28 adicional cu cada hogar lo mester paga pa cubri e interes mas halto cu gobierno y mayoria den parlamento a scoge.

Pakiko? Paso tin algun politico na Aruba cu kier play grandi, nan kier pretende cu parlamento ta eherce debido supervision financiero riba gobierno. Na 2022 mayoria den parlamento (MEP y RAIZ) a pasa presupuesto 2022 contra conseho di CAft y den violacion di e LAft pero awor nan kier argumenta cu CAft y LAft ta funciona. Presupuesto 2024 ta viola e protocol Aruba-Hulanda cu ta exigi un bahada nominal den gastonan di personal. Apesar di evidencia recien y historico cu mayoria den parlamento NO por eherce control financiero debido, MEP, RAIZ y AVP kier insisti cu si.

E resultado pa pueblo di nan negacion di realidad lo costa pueblo di Aruba un 365 miyon florin mas. Gobierno a lansa campaña di desinformacion cu Hulanda kier tuma over. Sin corda cu Corsou y Sint Maarten tin Rft desde 2010 y bo no ta tende ningun hende ta grita cu Den Haag ta goberna nos isla rumannan. Staatssecretaris tabata hopi claro, e normanan y supervision finaniero mester ta den un rijkswet dus kiko gobierno kier logra cu un proposicion hibrido ta desconoci.

MinPres a indica cu si no por logra un miho interes cu Hulanda lo busca refinanciamento riba mercado internacional y local. Esey no lo ta na menos cu 6,25% cu ainda ta 302 miyon florin mas caro cu acepta e rijkswet. Fuera di esey nos no ta mira ningun movecion di parti gobierno pa reduci gasto, na 2024 gobierno kier hisa gasto pa 75 miyon florin, si nos inclui e gastonan di interes mas halto sin e RAft nan lo ta hisando gasto pa casi 110 miyon florin compara cu 2023.

Ta na unda nos ta bay ora nos mesun gobernantenan ta grita tur dia cu no tin placa (pa adulto mayor, enseñasa, infrastructura, medio ambiente, salubridad etc.) pero hunto cu nan 11 marionetanan den parlamento ta dispuesto di tira 365 miyon florin afor na interes mas halto. Esey mientras nan ta hisa nan mesun gastonan pa 75 miyon florin despues di azota pueblo cu dos medida. Pa colmo ta gasta fondonan publico (lesa placa di pueblo) pa malinforma pueblo cu p.e. 5,1% no tabata disponibel manera MinFIC a haci ultimo.

Na 2024 Aruba su gastonan di interes lo ta rond di 313 miyon y si nos añadi pagonan riba proyectonan PPP di 80-100 miyon, Land Aruba lo ta pagando mas cu 400 miyon florin na servicio di su obligacionnan financiero. E culpa berdadero cu nos a yega te aki ta parlamento mester carga cune paso ta nan ta aproba presupuesto. Luga di reconoce nan deficiencia, awe un mayoria den parlamento kier grita cu e rijkswet ta mina nan autoridad, tin evidencia cu nan a sirbi anto? Mundo riba su cabes.

“Nobody makes a greater mistake than he who does nothing because he could do only a little.” Edmund Burke.