Mi a tuma nota di un comunicado di prensa di Partido MEP ta insinua cu mi no sa ki reunion mi a participa aden na Hulanda. Den nan afan pa desacredita oposicion nan lo lansa cualkier mentira pa desvia di nan mesun mediocridad. Awor tur parti di Reino ta ser representa na Tripartite y IPKO cu un delegado pa fraccion, voorzitter y Griffier. Awor na Aruba e partido bieunan (lesa MEP y AVP) ta contra adopta esey paso asina e keiromento cu placa di pueblo ta caba. Pa colmo net partido MEP cu a bin cu 5 delegado Hulanda, un di nan no ta ni miembro di Commissie Koninkrijks Aangelegenheden en Buitenlandse Betrekkingen (CKABB), kier papia riba representacion.

Pueblo a paga 75.000 mil florin pa manda Vrolijk, Tromp-Lee, Tevereden, Hoek y Berlis (cu no ta ni miembro di CKABB) Hulanda pa representa nos pais. Esaki ta mi di cinco Tripartite y IPKO, pues mi ta compronde e diferencia entre e reunionnan miho cu e delegadonan di MEP sigur. Ultimo IPKO Voorzitter di Comicion, Sra. Tromp-Lee, a pone henter Aruba na berguensa cu su speech di entrada ta keha cu Arubano no tin voto den Tweede Kamer. Vrolijk a lansa cu atakenan contra Hulanda y e resultado di esey ta cu awe Hulanda ta exigi adoptacion di e RAft pa herfinaciering.

Loke si ta perhudica Aruba ta e negociacion deficiente di tanto gobierno di MEP como Parlamento. Nos tur a mira con Aruba a perde 293 miyon florin di inversion fe Hulanda ora a pasa di COHO pa un onderlinge regeling. Awor e landspakket a keda exactamente mescos pero awor nos no ta haya 293 miyon florin di inversion, ken a perde Hulanda? Ora MEP ta lidera delegacionnan di Aruba a base di compleho luga di strategia, ta pueblo di Aruba ta perde. Ora voorzitter ta asumi un posicion cu no ta carga pa Parlamento unanimamente, e mes ta habri su mes pa critica den media local.

Prome Minister a firma un acuerdo cu Hulanda cual ela kibra. Ela kere e tabata masha sabi di cambia COHO pa onderlinge regeling pero landspakket a keda mescos y nos a perde 293 miyon di inversion. Despues cu Aruba a kibra su acuerdo cu Hulanda, Gobierno Wever-Croes a purba desvia fe di e LAft y hisa pone un deficit di 227 miyon pa 2022 contra tur recomendacion di CAft. Aruba mester a bay bao menasa di un aanwijzing pa porfin Gobierno di MEP eherce prudencia financiero.

Pues ora delegacion di MEP, den e caso aki Voorzitter di Staten, kier bin grita cu Aruba merece herfinanciering sin e RAft, mi ta puntra mi mes si e hende nan ki sa reflexiona? Boso gobierno a kibra tur acuerdo cu e mes a firma cu Hulanda. Mayoria den Parlamento a pasa un presupuesto iresponsabel contra tur conseho y despues ta unicamente bao menasa di un KB a drech’e y despues Voorzitter di Staten kier kere cu Aruba tin credibilidad ainda na Hulanda?

Luga di Partido MEP saca comunicado di mentira a base di un fout den un titulo, nan bay puntra pueblo si ta na su luga cu 75.000 MIL FLORIN a wordo gasta pa trece henter un delegacion di 5 bin Hulanda. No lo ta posibel pa nan haci mescos cu Corsou, Sint Maarten, Eerste Kamer y Tweede Kamer y fungi posicion di fraccion prome cu e reunion pa no mester bin cu mas cu mitar fraccion? E berdad inconveniente ta keda, ta mas facil pa e partido bieunan culpa Hulanda cu mira nan mes den spiel pa e trayecto di pobresa cu nos pais ta bibando pa ultimo decadanan bao nan mando.