Un rescate di 182 persona cu tabata riba un boto fragil na caminda pa bay costa di Libia, a yega tera di Italia riba diamars, cu alegria, emocion y speransa, pero tambe cu pregunta di ‘kico ta bin despues?’
Pa hopi di nan, e pregunta ta keda si nan mag di keda na Europa, y na cua pais? Kico nan lo scoge? Nan por bay scol awo cu nan ta adulto? Con e costo di bida ta? Nelson Oyedele, 37 aña di edad, a huy di pobresa y violencia na Nigeria cu su casa y 4 yiu.
“Mi no sa unda mi lo keda, mi ta djis bay. Mi yiu muhe ta bisa cu e kier bira un doctor. Na mi pais nunca e lo por a logra bira un, por ta aki e por logra”, Oyedele a bisa reportero di AP a bordo di barco di rescate, Ocean Viking.
Oyedele tabata e unico hende homber den barco cu tabata cu henter su famia. E resto den barco a laga atras nan casa, yiu, mayornan. Abdul Kerim, di 20 aña, a bisa cu el a huy di persecucion na Togo y kier ta reuni cu famia cu ta biba na Alemania.
E ta spera di ricibi asilo y ta habri pa traha den cualkier trabou, pero su soño ta pa tin su mesun compania di construccion. “Mi lo traha pa Europa y duna tur locual mi tin. Si ta posibel, mi lo kier mi famia compaña mi”, el a bisa. Su casa y su yiu homber di 2 aña a keda na Togo.
Kerim y otro den barco cu a yega no tin control unda nan lo bay. Nan destino lo wordo dicidi pa negociacion entre otro pais di Europa, cu mester dicidi si lo acepta nan. Esunnan cu ta haya asilo ta esunnan cu ta huy di guera of persecucion. Persona cu ta scapa pa motibo di pobresa, no hopi biaha ta cualifica.
E migrantenan abordo di Ocean Viking ta bin di pais manera Sudan, Camerun, Guinea, Mali, Egipto, Maroco y Bangladesh. Ora nan a yega, di biaha kier a tuma contacto cu nan sernan rekeri na nan pais despues di a bandona Libia, caminda a abusa, tortura y horta placa for di nan.
Ocean Viking a para na Messina, Italia, despues di ricibi permiso pa drenta e pais. Un pais cu despues di cambio di gobierno a cera nan puerto pa barco humanitario. Polis y Cruz Cora a warda pa migrante baha.
