(AP) – Migrantenan a core crusa e frontera cu Merca riba diahuebs, purbando di drenta e pais prome cu e restriccionnan riba asilo relaciona cu pandemia keda retira den un cambio cu ta menasa di pone un presion historico riba e nacion su sistema di inmigracion.
E fin inminente di e reglanan conoci como Title42 a causa miedo den e migrantenan cu e cambio aki lo haci hopi mas dificil pa nan por keda na Merca y e administracion Biden a enfrenta obstaculo legal serio ora cu un hues federal a temporariamente blokia su intento di laga migrantenan sali cu mas rapidez ora cu Border Patrol (warda costa) ta yen.
Cu un fin den horizonte, mal informacion y confusion a causa cu e migrantenan a tuma decision di crusa e frontera na Rio Grande, sin ta sigur di kico lo bin despues.
Na Matamoros, gran cantidad di migrante, algun cu muchanan chikito, a crusa riu pa ser confronta cu un frontera foritifica. Otro migrantenan a drenta shelter na Mexico, determina pa sigura un afspraak pa solicita asilo cu posiblemente por tuma lunanan prome cu nan por yega na esaki.
Hopi di e migrantenan ta altanto di e cambionan di politica cu tin e meta di combati e crusamento di frontera ilegal y encurasha e solicitantenan di asilo aplica online y considera destinonan alternativo manera Spaña of Canada. “Mi no sa kico ta bay pasa mañan,” Jhoan Daniel Barrios, ex militar di Venezuela a comenta mientras e tabata cana na e frontera buscando manera di busca refugio na Merca. “Nos no tin placa mas, nos no tin cuminda, nos no tin unda pa keda, e cartel ta persegui nos,” Barrios a bisa, ken su casa ta den custodia di Merca. “Kico nos ta bay haci? Warda te ora nan mata nos?”
