Dialuna a bira publico algun documento hudicial, relaciona cu e caso di 10 migrante cu a resulta morto den un truck na Texas. E documento ta bisa cu personanan cu tabata den e truck tabata tuma turno tras di otro pa hala rosea via un buraco cu tabati den banda di e trailer aki. Segun declaracion di persona cu a ser rescata, nan tabata purba di yama atencion di e chauffeur cu varios golpi na structura di e truck, pero chauffeur no a paga tino.
Un pasahero a splica na autoridad cu nan a crusa e frontera cu Mexico y despues nan a bay riba un truck , cu loa laga nan na San Antonio, Texas.
E declaracion ta splica cu pasaheronan tabata parce bon durante e prome ora di trayecto, pero despues nan a cuminsa haya problema pa hala rosea den e truck. Autoridad a denuncia e chauffeur di e truck, pa fayecimento di inmigrante cu tabata biaha den e truck. Fiscalnan a presenta acusacion contra James Matthew Bradley Jr., di 60 aña, pa delito di transporta inmigrante cu obhetivo di haya ganashi comercial o financiero, y cu a resulta den fayecimento di e personanan.
Version di e chauffeur
Bradley a bisa autoridadnan cu e truck a ser bendi y cu e tabata hiba esaki di Iowa pa Brownsville, Texas. El a afirma cu e no tabata sa di presencia di persona den e truck. El a declara cu el a haya si di e grupo di persona, ora cu el a detene e truck pa bay baño. Despues cu el a tende grito y golpi, el a habri e porta y el a keda “sorprendi, ora cu a mira varios persona hispano core, mientras cu el a cay riba suelo”, segun e declaracion ta informa. Bradley a bisa investigadornan cu e tabata sa cu e sistema di airco di e truck no tabata sirbi, y cu tur cuatro buraco di ventilacion por tabata cera. El a bisa cu e no a yama 911, apesar cu el a mira varios persona fayeci den e truck.
