Mientras ta gara delincuente chikito… E grandinan ta ‘walk away’…?

Den nos edicion di ayera (diabierna) nos a toca e tema di e caso di fraude na Hospital, cu na nos parecer no a haya e atencion cu mester. Ta inaceptable cu di e manera aki ta anda cu un caso di cual tin tanto detaye conoci caba, y a pesar cu tin un rapport traha pa Hospital riba e asunto, por lo visto no ta sucediendo nada. Hospital ta bisa cu nan ta den corte, probablemente cu un caso di disolucion di e contrato laboral cu ambos persona, pero esey no por kita cu tin un caso di delito cometi. Y ainda Hospital no ta haci loke nan mester a haci desde e promer momento, y esey ta haci denuncia na Ministerio Publico. Lo nos bay tende algun argumento fofo pakico esey no a sucede, pero nos no tin pakico di acepta esaki. Nan lo por bisa cu nan no tin tur prueba ainda, pero esey no ta un bon motibo. Ora bo ta den e tipo di puesto di responsabilidad publico, bo no ta haci aangifte ora tur cos ta cla. Bo ta hacie pasobra tin suficiente indicacion di algun delito, y e idea ta pa autoridadnan hudicial ‘take over’ y haci e investigacion corespondiente, haciendo uso di e poder y facultadnan cu nan tin pa esey. Tin mas caso cu a maneha di e manera troci aki, y e pregunta ta pakico.

Nos impresion ta cu a actua di e manera cu a actua, elaborando un rapport bon secreto, posiblemente pa no afecta otronan cu a hunga un papel den esaki tambe. Talvez no na nivel di ta envolvi criminalmente, pero si coresponsable pasobra no a actua cu diligencia pa para e proyecto aki. Y ta aki tin varios cu lo tin manteca riba nan cabez. Pa ilustra esey nos ta bay back na e sucedidonan. Un dado momento un hefe Hulandes di e laboratorio di Hospital a bin riba e briyante idea cu e Paptestnan no por keda Aruba mas, sino cu nan mester bay Hulanda pa procesa nan. E gastonan lo ta considerable, pasobra nan ta bay costa 190 euro cada un cerca ‘un compania cu e conoce bon’. Pa cuminsa, e mester a convence e directiva di e fundacion bao di cual e laboratorio ta cay. Seguidamente lo a hiba e asunto pa e directiva di e fundacion di Hospital mes. Ainda ningun hende a haci ningun pregunta fastioso, obviamente, pasobra e peticion ta bay na 2018 pa AZV pa acorda placa extra pa cubri e gasto aki. Con e deliberacion a bay nos no sa, nos ta wak resultado. Y esey tabata cu a aproba e suma pa cubri esaki.

Un par di pregunta simple pa cual ningun di nos mester a bay ningun universidad: Cuanto e Paptestnan na Aruba tabata costa? Logicamente Hospital no kier bisa nada di prijs, pero di otro fuente confiable nos sa cu e kitnan ta costa un fraccion di e 190 euro. E procesamento na Aruba mes ta costa naturalmente e costo normal di laboratorio pa tanto tempo cu ta tuma pa analisa un test. Nos no sa esey exactamente, pero tampoco ta algo dramatico pa cada test. Y pakico ningun hende, den e proceso aki cu a pasa den tres entidad cu supuestamente ta serio, y ningun hende a para e locura aki? Y ta spera di e publico aki na Aruba pa nos kere cu e dos personanan aki a actua completamente riba nan mes? Despues cu nan sinta nan castigo mihor e dos delincuentenan aki bira sacerdote o politico, pasobra mester bisa cu nan tin un enorme potencial pa convence otro hende…

Pero esey no ta tur e fayonan cu e caso aki a trece dilanti den nos sistema publico. Loke nos por a comprende te awor di nos Ministerio Publico ta cu tanten bo no bin benta e caso ‘morto morto’ dilanti nan porta, nan no ta actua. Nos no ta guli e argumento aki, pasobra tabata e propio Procurador General cu a bisa, tempo di e caso Ibis, cu e asunto a cuminsa cu nan a mira algun indicacion di corupcion riba Facebook… y asina nan a cuminsa move… Nos no por a pensa cu algun aña despues nos mester usa e mesun asunto aki pa argumenta contra un Ministerio Publico, cu awe no ta move tanten no tin denuncia. Simplemente no ta berdad cu nan no tin e facultad pa investiga un caso sin cu tin denuncia, cu nan no tin gana pa hacie, esey ta otro cos.

E motibo pakico nos ta kere cu den e caso aki sigur dia bieu Ministerio Publico mester a haci algo, ta e ‘interes general’. Un caso di un miyon florin di placa di pueblo, pasobra AZV ta opera na nos beneficio riba placa genera pa nos sudor, ta suficiente motibo pa haci esey. Claro cu no ta promer biaha cu Ministerio Publico no ta haci nada den un caso di fraude di miyones, nos tur por corda ainda cu te awe no a haci denuncia den e fraude na Setar, unda varios miyon a disparce. Den e toque de queda a actua rigurosamente contra esun cu no a cumpli, pero ora bo horta miyones bo ta OK?