Ayera tardi, reportero di Bon Dia Aruba a cana den area di ex-edificio Reina Beatrix School y Juliana School Mavo pa mira kico ta e estado di e edificionan aki. Lamentablemente loke a ser mira ta un estado di deterioro avansa y pio ainda ta cu no tin ningun solucion ni plan den bista pa e dos edificionan aki, di cual un di nan ta un monumento reconoci.

Manera ta conoci caba, e dos edificionan aki tin varios aña caba bandona y esaki a conduci cu ambos edificio ta deteriorando rapidamente. Na varios ocasion a menciona posible plannan of ideanan di renobacion pa e edificionan aki, pa un of e otro, pero no a concretisa nada te cu dia di awe.

Juliana School Mavo ta bay haya un edificio nobo. Aña pasa Minister di Enseñansa y Deporte, Endy Croes, a anuncia cu a stipula 6.7 miyon florin pa construi un edificio completamente nobo pa Juliana School.

Na aña 2016 e staf, personal y alumnonan di Juliana School mester a bandona e edificio pa motibo cu e condicionnan di e edificio no tabata cumpli cu e standardnan y pues a muda bay na un otro edificio, cu tampoco tabata apropia pa e alumnonan haya les.

Durante e reunion di presupuesto complementario 2023, minister Croes a indica cu danki na e surplus a haya e fondo necesario pa construi Juliana School y lo inicia cu e proyecto di construccion durante e prome lunanan di aña 2024.

El a indica cu el a reuni cu e staf di Juliana School pa involucra nan den e proyecto y trece nan peticionnan dilanti. Durante e reunion Juliana School a opta pa haya un scol completamente innovativo y di e forma aki a diseña e scol pa esaki cumpli cu recomendacion 3 di Doorlichting van het Arubaanse Onderwijsbestel, cual ta indica cu mester tin un infrastructura adecua pa enseñansa.

Despues di e noticia aki, ariba rednan social tabatin reaccion di diferente ciudadano cu a cuestiona pakico no a inverti e placa den e remodelacion di edificio existente, en bes di construi uno completamente nobo y laga e edificio existente bay completamente perdi of evita cu nan ta destrui/basha esaki abao. Tambe mester cuestiona pakico a permiti pa e edificio bay den un estado di deterioro asina avansa cu mester a muda e scol, na lugar di dun’e su debido mantencion.

Pa loke ta e ex-edificio di Reina Beatrix School, e edificio aki ta un monumento reconoci, pues no por destrui ni basha e edificio aki abao.

Na aña 2024 e edificio aki a wordo cera y a muda e staf y alumnonan di Reina Beatrix school pa otro localidadnan, ya cu e klasnan a wordo dividi den dos localidad diferente. Motibo pakico a scoge pa cera e edificio aki ta pasobra e ta un monumento y e la bira mas costoso y dificil pa por drecha back.

Algun tempo atras ariba rednan social un persona a publica un serie di potret di paden y pafo di e ex-edificio di Reina Beatrix School na unda por a mira tambe con deteriora e edificio ta. Algo cu a trece hopi sentimento di tristesa pa otro usuarionan, ex-alumnonan di e scol y cu a expresa nan opinion den e comentarionan.

“Hopi jammer…ta haci dolor pa wak e school den e estado aki,” un usuario a comenta. Mientras cu otro a puntra ta pakico a bandona e edificio aki y lag’e deteriora di tal forma. Otro a indica cu ta algo “masha tristo mes pa mira e edificio di ‘nos’ scol asina” y asina hopi otro tabata sorprendi di con atras e ex-school aki a bay sin cu ningun instancia a interveni te na e momentonan aki.

Algun aña pasa e edificio aki a bira un monumento reconoci, pero te cu dia di awe ni Gobierno di Aruba, ni Monumenten Bureau a haci algo pa yuda renoba e edificio aki. No ta conoci si tin choller ta biba den algun di e edificionan aki, pero den e estado cu nan ta, ta evidente cu hendenan ta drenta den e edificionan vandalisa e propiedad, laga sushi eyden y lamentablemente ningun instancia ta haci nada.