Sospechoso J.G.T. acusa di a comete actonan di abuso sexual contra menor di edad tabata den corte diahuebs pa un caso pro forma na unda cu su abogado a pidi pa e su detencion wordo suspendi pero hues a rechasa e peticion ey, segun Ministerio Publico.
Sospechoso J.G.T. acusa di abusa un menor di edad den periodo di 2013 pa 2015, e caso a wordo
posponi pa 7 di October venidero segun Ministerio Publico. E caso ta conoci den comunidad door cu e persona cu a haci e keho, esta Sr. Reginald Danies, e tata di e menor, ta supla graffiti na diferente parti pa hala atencion pa e caso. Ta resulta cu awor na varios parti di Aruba, diferente otro hende tambe a cuminsa spuit esaki y otro cosnan tambe rond di e isla. Spuitmento a cuminsa bira algo popular awor manera un forma di protesta. Sin laga afo cu awo hasta iglesianan a bira victima di e forma di protesta aki manera ultimamente e misa di Paradera, caminda riba e muraya parti pa Noord di e misa a wordo skirbi cuater graffiti cu e palabranan ”Anti Gay” , den e caso aki segun Pastoor Toti Fuentebella, pa motibo cu Iglesia Catolico a expresa contra e amienda cu Parlamento kier bin cu ne.
Spuitmento por transforma den algo pio?
Si spuitmento di graffiti ta e resultado di protesta cu actualmente comunidad di Aruba por mira na casi tur skina, esaki lo por transforma den algo otro si e no wordo atendi apropiadamente? Segun Ann Angela di Ministerio Publico ta splica Bon Dia, fiscal ta trahando riba e asunto aki. Awo e pregunta ta keda si no tin castigo pa ora cu bo ta spuit, ta bay warda te ora cu henter Aruba ta bao di graffiti prome cu haci algo of ta bay hisa e castigo di ”vandalismo” so anto kico mas despues di esey? Ta obvio cu tin un descontento den comunidad di Aruba y no a bay asina leu ainda den destruccion di propiedad ni daño severo di ningun clase fuera di un tiki graffiti riba e cabaynan blauw cu a wordo haci limpi mesora, piedranan na cierto parti di nos beachnan y otro caminda manera veldnan of riba caya. ”E ta haci dolor bo sa, pero mi tin cu sigui lucha” , Sr. Reginald Danies a bisa Bon Dia den un entrevista poco siman atras.
