Mientras servicio di entrega di anticonceptivo ta crece: Edad di prome experiencia sexual ta baha

E hecho cu Fundacion Famia Plania Aruba ta hayando mas cliente cu ta bishita nan localidad na Oranjestad, ta un thermometer pa nan sa cu nan ta canando e caminda corecto, unda muchanan y hobennan por haya informacion adecua den forma anonimo. Nan ta haya bishita di alrededor di 40 hende pa dia.

E echo aki ta uno positivo, debi cu tin biaha e trabou di conscientisacion y informacion cu nan ta bin realisando no ta uno facil. Esaki ta debi na e era digital y divulgacion incorecto di tur sorto di informacion online. Tambe tin caso cu hende cu no tin e conocemento ta duna informacion incorecto. Trahado Social y Coordinador di e fundacion aki, Jonathan Trinidad, ta lamenta cu ora algo ta bay fout, ta bay bati na nan porta, caminda eynan si nan ta haya e informacion y guia corecto.

Servicio di entrega
No solamente e dunamento di informacion pa medio di charla completamente adapta na diferente scol ta parti di nan servicio. Pero tambe e acceso na informacion y metodo anticonceptivo na nan clientenan nobo y existente ta parti di nan servicio tambe. Pero un servicio cu a haya hopi acogida ta esun di servicio di entrega, conhuntamente cu nan ‘online store’ pa asina nan por cumpra nan productonan online; y e fundacion mes ta entrega esaki na e cliente. Tin biaha nan ta haya entre 8 pa 9 servicio di entrega pa dia.

E ta un servicio relativamente nobo, cu recientemente a cumpli un aña unda tur hende, tanto hoben como adulto, por bay online for di nan celular y selecciona e producto cu nan tin mester. Pero nan mester hinca cierto informacion confidencial, caminda e fundacion ta tuma contacto cu nan, ya cu e online store ta conecta cu e servicio di entrega.

Nan ta trece e producto na unda cu e persona kier, y no tur ora ta un adres di cas. Segun Trinidad, tin sitio strategico cu e hoben ta scoge pa haci entrega di nan producto. Te hasta e por ta un establecimento di fast food, te hasta na biblioteca mes. “Esaki ta indica cu e hobennan ta consciente y cu nan ta haci uzo di un servicio pa nos por yega mas cerca di nan,” el a bisa. Tambe esaki ta un forma pa clientenan tin mas facilidad sin mester di move te nan localidad.

Te hasta si nos muchanan ta sexualmente activo, nan por haya e producto adecua cerca nan. Pa hopi aña caba e fundacion aki a forma un colaboracion cu AZV, caminda cada hoben ta haya nan producto completamente gratis te cu 21 aña di edad.

Comportacion sexual
E ta aclaria cu aunke e fundacion aki no ta esun pa bin bisa kico ta e edad perfecto pa cuminsa un relacion sexual, pero si nan por mira cu edad di esunnan cu ta tene sex pa prome biaha a baha drasticamente. A base di investigacion interno cu nan mes a realisa, e fundacion tin clientenan di 12, 13 y 14 aña di edad.

Igualmente via e fundacion su pagina di Facebook y Instagram, anonimamente bo por formula tur bo pregunta relaciona cu sexualidad, producto anticonceptivo y salud sexual. Nan trahado social ta contesta tur e preguntanan 24 ora pa dia.

E fundacion por mira un cambio positivo den e comportacion sexual di nos comunidad, debi cu nan ta compronde cu ‘salud sexual ta mas cu djis relacion sexual’, el a declara. E ta relaciona te hasta cu derechonan sexual, cu ta conta pa tur hende na cualkier edad, mescos cu e derechonan humano. Entre nan, derecho sexual di privacidad, desaroyo sexual, te hasta di experimenta. E ta aclaria cu no kier men cu e fundacion ta para pa ‘bagamunderia’, pero si ta yega e caso di experimenta, ta importante e uzo di proteccion.

Tur data relaciona cu nos hobennan nan salud sexual reproductivo, ta wordo refleha riba e cifra di embaraso desea of no desea. Ultimo aña, e fundacion aki a abstene di uza e terminologia di embaraso hubenil, pasobra nan por ta embarasonan ya sea desea, of no desea. E situacion den cada caso ta diferente. Tin hoben cu, tin biaha pa sali for di cierto problema interno den nan seno di famia of problema financiero, ta dicidi di sali na estado. Pues esaki no ta e solucion corecto, pero den e caso aki no por papia di embaraso no desea. Pero no por nenga si cu e cifranan di embaraso den e poblacion hubenil ta keda crece keto bay, locual ta un tendencia, segun organisacionnan internacional.