Actual parlamentario di MEP, Chris Romero tabata masha reserva pa duna informacion riba su participacion como minister den e gobierno nobo di coalicion (MEP-POR-RED). E ta admiti cu su nomber tambe ta wordo menciona como candidato pa bira minister den e gabinete proximo. Pero e ta prefera cu na su debido momento, formado di gobierno, Evelyn Wever-Croes lo referi na dje.
“Mientras tanto e screening no ta cla mi no por bisa cu ta shen porciento asina”, el a declara durante e conferencia di prensa di partido MEP cu a tuma luga den nan sede ayera mainta. Sr. Romero a insisti cu ainda e tarea cu e mester asumi den e gobernacion nobo no ta cla ainda. Nan mester wak prome e diferente cartera y kendenan ta esun nan mas apropia pa tuma e diferente encargo. E ta haya cu formado di gobierno a realisa un tremendo trabou pa determina cual partido ta bay cu cierto cartera y awor kende lo ta e persona adecua pa tuma encargo den e cartera ey.
Sr. Romero a ripiti loke ya caba formado di gobierno a informa diabierna ultimo. Esta cu ya nan a bin cla riba e parti di reparticion di cartera entre e tres partidonan cu ta forma e coalicion aki. El a bisa cu e reparticion aki a wordo aproba den e seno di e conseho di partido. Awor nan ta na spera di e resultado di e screening .
“Berdad bo ta tende diferente nomber ta sali afo pero e realidad ta cu mientras e resultado di e proceso si screening no ta cla, ainda ta e candidatonan pa bora minister ta na expectativa. El a bisa cu e proceso aki nan ta tum’e hopi na serio pero unabes cu esaki ta cla e ta haya cu ta ‘adecuado pa nombra berdad kende ta bira kico’.
