Ayera mainta den salanan di Gloria IMAX a presenta e premiere di e pelicula “Otro banda di e cam”, e cual ta un pelicula produci pa e compania local Freeway Agency bou encargo di Coordinatiecentrum Mensenhandel Mensensmokkel Aruba (CMMA).

Esaki ta trata di un pelicula cortico cu ta enfoca riba e fenomeno di traficacion y contrabanda di hende, algo cu hopi biaha ta pensa cu no ta pasa na Aruba, sinembargo ta un problema global, y sa pasa den e manera mas fini cu ta haci haci cu hende no ta consciente di dje, y awe ta haya su atencion un biaha mas.

Durante e premiere di e pelicula aki, prome minister Evelyn Wever-Croes conhuntamente cu minister di Husticia y Asuntonan Social Rocco Tjon a dirigi algun palabra tocante e fenomeno aki, segun minister Tjon, na Aruba tambe ta duna na e fenomeno aki cada aña mas atencion, y asina por a tuma nota di e progreso cu a logra den e delaster añanan, cual a ser constata tambe door di entre otro US department of State.

Na 2007 Gobierno di Aruba a dicidi cu e problema di traficacion y contrabanda di hende mester bira un di e topiconan pa pone mas atencion na dje.

CMMA ta encarga cu tres tarea specifico pa loke ta traficacion y contrabanda di hende: Informa, Educa y Asisti. Asina, hendenan ta testigo di un otro resultado den e tarea di Educacion bou e capa di e pelicula ‘Otro banda di e cam’, cu ta parti di e campaña pa concientisa pueblo ‘Habri bo wowo’. Den e pelicula aki ta pone atencion riba un forma moderno di explotacion y e mundo di sexcams.

Aunke no tin informacion ainda cu e esaki ta tuma luga na Aruba, indicacion ta cu esey por yega akinan tambe, mundo ta cambiando lihe y explotacion via plataformanan digital ta aumentando.

Pa e motibo aki, e campaña mas recien di CMMA bou e titulo ‘No cay den trampa’ ta hopi na su luga, e ta pidi atencion di hobennan, mayornan, docentenan y pueblo en general pa e riesgo di online trafficking.

Banda di e tarea di Educacion, CMMA tambe a traha duro pa realisa e tarea di asistencia. Hunto cu International Organization on Migration (IOM) un Standard Operating Procedure (SOP) a wordo scirbi pa crea un sistema di asistencia profesional y consistente na victimanan di traficacion di hende. IOM tambe a coopera pa financia un consehero pa traha un plan di implementacion di e SOP.

E calidad di un pais por wordo midi na e nivel di atencion cu ta wordo duna na asistencia pa victimanan di crimen. Pa e motibo aki, actividadnan den e ramo di asistencia mester por wordo guia doir di esun cu a experiencia traficacion di hende. Nan informacion ta esencial pa determina riesgonan, pa identifica y proteha victimanan, pa sigura acceso na husticia y pa yuda nan durante e proceso pa investiga, persigui y condena e traficadornan.

Caso di traficacion di hende awe den corte
 Awe ta tuma luga caso di e dos sospechoso R.Laveist y R. Stamper na corte di prome instancia na unda nan ta acusa di trafico di hende.

Tabata luna di maart ultimo ora e persona cu e nomber Lady Salazar Moreno a sali cu boto for di Puerto Escondido estado Falcon na Venezuela caminda pa Aruba na unda el a disparce.

Na april, e Arubiano R.Laveist a confesa publicamente den diferente medionan local cu el a haci un prome intento di busca Salazar na januari pero esey a fracasa. Tabatin palabracionnan, plannan y transaccion financiero pa trece Salazar Aruba.

Pa loke ta trata R.Stamper Bon Dia Aruba a haya un audio den cual Stamper ta declara cu su prome contacto cu Salazar tabata den awa teritorial di Venezuela na unda pa evita cu Kustwacht wak por a wak nan cu radar di Aruba haci contacto cu otro, nan a tira Salazar cu un boei blauw na awa pa despues Stamper por pasa y pik’e.

Ora Stamper a pik’e for di lama el a wak caba “cu Johana no por landa, ora ma carg’e y hink’e den mi boto.”

Despues el a conta cu nan a coy direccion pa Aruba -Johana cu Stamper so den boto- e tabata sa caba cu Kustwacht tabata wardando riba nan unda su boto semper ta para den Colony.