Den e debate reciente cu ministro di Husticia tocante e situacion alarmante di crimen pisa na Aruba, a bin dilanti tambe e aspecto di falta di recurso financiero y di personal.
Bon Dia Aruba a yega di publica caba varios biaha cu ministerio di Husticia ta un di ministerionan cu ultimamente a entrega recurso financiero y por lo tanto tambe, puesto di trabao (Afl. 3 miyon den presupuesto 2016). Recientemente ministro di Husticia a declara cu su ministerio mester di por lo menos Afl. 10 miyon pa por atende e asuntonan urgente nan dilanti.
Den e reportahe di mara aña 2016 cu gobierno ta obliga bao di ley encuanto CAFT di duna parlamento y e organismo di supervision aki, ta aparece un resumen di e cantidad di “Full Time Eenheden” (FTE’s) pa cada ministerio. For di e resumen aki, cu Bon Dia Aruba ta presenta sin modificacion aki bao, ta resulta cu den e prome mita di e aña aki, principalmente dos ministerio a entrega cupo di trabao: ministerio di Husticia y esun di Enseñansa. Entre fin di december 2015 y fin di juni 2016 Husticia a perde 17 cupo di trabao (di 1429 pa 1412). Den e mesun periodo gobernacion en total a economisa solamente 10 cupo (di 3873 pa 3863). Conclusion: e reduccion di cupo di trabao na Husticia a percura pa en total gobernacion baha 10 cupo di trabao full time, pero tambe a compensa pa den otro ministerio aumenta e cantidad di cupo di trabao.
Remarcabel tambe ta cu den enseñansa (publico) cu tambe ta aparece riba e lista aki, a baha 20 cupo di trabao. No ta conoci ki tipo di cupo esakinan ta, sea cupo di maestro o di personal administrativo. Nota: aki no ta trata di personal di e ministerio mes. Esey ta aparece separadamente bao di e ministerio, cu por cierto a aumenta cu 3 cupo di trabao. Tambe ta aparece apart e cantidad di personal di Warda Nos Costa, cual a aumenta cu 7 cupo. No ta conoci cuanto di e gastonan envolvi ta core pa cuenta di Pais Aruba. En total por bisa cu den gobernacion a economisa pa 30 cupo di trabao, cu si e situacion aki ta permanente, riba base anual ta duna un reduccion di gasto di alrededor di Afl. 3 miyon. Esaki ta representa mas o menos 0,6% di e gastonan total di payroll directo di gobierno pa 2016. Den esaki no ta conta e gastonan adicional di salario di e sector subsidia (± Afl. 160 miyon pa aña).
