asbest (1).jpg

Habitantenan di Fort Heuvelstraat ainda no a haya niun reaccion for di gobierno ni Valero pa cu e sushi, entre otro asbest, cu e refineria a dump riba e tereno cercano.

 

Tin dies aña cu habitantenan ta pidi claridad riba e e dump di asbest y otro sushi riba e tereno cu ta hopi cerca di nan casnan. Y e refineria ta keda dump sushi segun e habitantenan. Un par di luna pasa por a mira un ‘cero’ nobo di sushi aparece patras di e cero grandi di santo cu ta tapa un gran cantidad di saconan cu ta contene asbest. Kico exacto e sushi nobo ta, no ta conoci pero un di habitantenan Jaap de Vries cu ta monitor e situacion diariamente, ta preocupa cu e sushi atrobe ta algo cu no ta bon pa medio ambiente ni pa e salud di e habitantenan cu ta biba cerca.

 

Siman pasa (riba potret) el a mira actividad nobo unda trahadonan a cuminsa uza e santo di e cero cu ta tapa e asbest pa tapa e sushi nobo. “Mi ta spera cu nan no ta sigui cu esaki pasobra no ta por nada cu a tapa e saconan cu asbest cu e santo”, segun De Vries cu tambe ta bisa cu segun normanan e asbest no ta bon warda. “Como compania Mericano nan no por haci esaki na nan pais madre. Nan sa cu na nan pais esaki no ta wordo acepta pasobra ta bay contra nan reglanan pa cu medio ambiente y salud publico.”

 

Caso Corsou
Na Corsou un caso similar ta tumando luga. Hasta a lanta un fundacion esta Fundashon Promove Derechi Humano Curaçao representando e victimanan di añanan di dump di asbest riba e tereno di refineria Isla. E aña aki e fundacion a entrega un keho na Ministerio Publico (OM) contra e refineria Isla y e compania Curaçao Refinery Utilities. Sinembargo OM no a haci nada cu e denuncia y awor e grupo a dicidi di bay corte pa exigi cu OM lo atende e caso.

 

E fundacion a entrega un keho a base di e Codigo Penal referiendo na articulo 2:121 cu ta bisa cu bo ta castigabel si bo ta laga un substancia peligroso pa salud scapa den aire conscientemente. Segun e fundacion esaki a sosode momento cu e refineria a dump e asbest. Nan ta haya e Refineria di Kòrsou, cu ta e doño di Isla culpabel. E doño concreto ta gobierno cu ta lease e refineria pa PDVSA.

Na Aruba gobierno awor a cera un contracto cu Citgo pa lease e refineria na San Nicolas y ta den negociacion  cu Valero pa e traspaso di e refineria y e terenonan. Pues lo bin un situacion similar cu esun na Corsou. Asina gobierno di Aruba lo bira doño tambe di e tereno cu e asbest y otro sushi. No ta conoci ainda si gobierno lo exigi di Valero pa limpia esaki.

 

Sinembargo e habitantenan ta keda preocupa pa nan salud y tambe kier un forma di compensacion pa e daño cu ya a tuma luga tur e añanan. Ya e habitante De Vries a pone Valero responsabel pa tur daño. Te ainda e no a entrega un keho manera na Corsou. Minister encarga cu e refineria, Mike de Meza, si a menciona cu nan no ta tuma responsabilidad pa echonan castigabel cu a tuma luga durante e tempo cu Valero ta opera e refineria.