Mientras FASE ta den su fase final, Gobierno tin un otro proyecto ‘Aruba Kier Traha’ pa yuda esnan cu no tin trabao

Un di e preocupacionnan di CAFT ta FASE. Durante e comienso di e pandemia, Gobierno di Aruba a introduci FASE pa asina yuda esnan cu a perde trabao. CAFT durante su bishita recien na Aruba, a papia cu algun hende cu segun nan nan ta haya FASE mientras nan ta traha haciendo e ora abuso di esaki. Den e caso aki, CAFT a menciona taxistanan entre otro. CAFT ta di opinion cu FASE meste wordo elimina.

Prome Minister Evelyn Wever-Croes a duna di conoce den un comunicado di prensa cu Gobierno di Aruba ta na haltura cu FASE ta den su fase final pa wordo elimina. CAFT a conseha pa haci esaki prome di November, pero Gobierno atrobe ta diferencia di opinion riba e punto aki. FASE ta drentando su fase final. Tur hende mester bay traha back. Gobierno di Aruba ta na haltura cu tin trabao, pasobra hopi comerciante ta keha tin trabao y nan no ta haya trahado. Tambe Gobierno ta na haltura cu no ta facil pa tur hende haya trabao pa motibo cu ora di yena aplicacion no ta facil tampoco.

Teniendo cuenta cu FASE ta den su fase final, Gobierno a bin cu e proyecto ‘Aruba kier traha’ pa asina a traves di e proyecto aki yuda esnan cu ainda no a yega na un trabao, pronto nan haya un trabao. E proyecto ta encera entre otro cursonan y guia pa yuda tur ciudadano haya trabao. E proyecto aki ta bao encargo di Minister Rocco Tjon y Minister Glenbert Croes y proximamente e lo wordo presenta na comunidad.

“Mientras cu ta trahando riba diversificacion di nos economia cu mas desaroyo pa crea mas cupo di trabao, nos mester pa tur hende realisa cu FASE ta drentando su fase final. Ainda ta deliberando cu Hulanda riba e fecha exacto pero no ta dura mucho mas. Awor aki nos tin mester di apoyo di tur hende cu ta den FASE, di tur comerciante cu ta depende di loonsubsidie. Awo ta e momento pa realmente duna back. Gobierno a yuda tur e tempo aki. Pero Gobierno no por keda mantene artificialmente esnan cu a wordo hopi mal afecta pa motibo di Covid. Gobierno lo sigui yuda a traves di esnan cu kier traha y pa tur yega na un trabao mas pronto posibel”, Prome Minister Evelyn Wever-Croes a enfatisa.