Mientras cu tin un lista largo di reclamo: Trahadonan ta malcontento cu director di Fundacion Facilidadnan Deportivo

Sindicato SEPPA, cu ta representa e trahadonan na servicio di e Fundacion Facilidad Deportivo (FFD), kier a expresa nan malcontento pa e declaracion cu director di FDD, Junior Tromp, a duna durante un entrevista. Mientras cu tin un lista largo di reclamo cu a wordo formula na e dirigentenan di FFD.

SEPPA ta señala cu, den un programa informativo di FFD, presenta pa Cadochi Kock, un cierto momento Kock a haci e pregunta na Junior Tromp di FFD: “Tin mantencion akinan? Tin hende ta traha akinan?”

E contesta di Tromp di FFD tabata: “Esaki ta pa atrobe ilustra cu tin hende ta yega djis pa yega. Esey ta refleha no riba su persona solamente, sino riba e managernan cu mester controla si trabaonan ta wordo ehecuta.”

Tambe Tromp a haci mencion –segun SEPPA– cu nos hendenan mester aprecia nan trabao y siña cu nan mester ta contento cu nan trabao. E comentarionan aki a cay den mal tera y ta obvio cu ta rebaha e trahado den su funcionamento.

E sindicato ta haya cu, en bes cu e director di FFD ta expresa su mes asina, ta bon pa record’e cu na luna di maart trahadonan, den presencia di SEPPA, a tene un reunion cu e directiva di FFD.

Reclamo
E reunion a wordo pidi a base di loke a palabra cu e miembronan di e directiva anterior, esta cu semper ta habri pa trahadonan, cu directiva kier scucha na unda mester drecha. Den e reunion aki, e trahadonan ta haci varios reclamo na e directiva:

– A pidi klei un aña pasa, ainda no a ricibi nada.

– Hopi molester di paloma, mester laba tribuna tur dia pa motibo di paloma, paloma tin e luga na werki. Nan ta haci e luga limpi, pa anochi ora cu tin wega e ta sushi atrobe.

– Tin un producto pa uza pa limpieza cu ta wordo cumpra pa cierto centronan, pero na un otro no.

– Tin critica cu e veld mester wordo haci limpi, pero no tin mashin. Ta un solo quadracer tin pa tur e veldnan.

– Ora di pidi material ta dura un pa un dia y mitar pa haya esaki.

– Holo desagradabel ta sali for di e baño na cierto centronan.

– Toilet no ta sirbi, ta keda gasta awa, nan mester wordo cambia.

– Shete aña sin ricibi un aumento di salario. Otro den 20 aña no a ricibi un aumento di salario.

– Ta pidi pa basha un vloer dilanti di e kleedkamer.

– Cura ta na werki, kico ta pensa di bay haci cune?

– E mashin pa ora di limpieza ta hopi bieu, ta pasa trabao pa start. Mester di un nobo.

Despues cu trahadonan a trece nan puntonan dilanti, Juni Tromp como director di FFD a contesta pa e directiva cu lo analisa tur e puntonan aki, y lo trece contesta den un proximo reunion. Te cu awe trahadonan no a wordo yama pa ningun reunion, corda pa haya contesta y/o solucion pa nan problemanan. Pero –segun SEPPA– si tin e cuero di cara pa critica y tira culpa riba e trahadonan di FFD di e mal maneho hiba pa e directiva.

Definitivamente, pa e sindicato cu ta representa e trahadonan, esaki ta un situacion inaceptabel. Trahadonan merece tur respet pa e trabao cu nan ta desplega y si FFD no ta percura pa material, esaki nan mester carga e responsabilidad p’e tambe. SEPPA ta spera cu e directiva nobo tin atencion pa loke tur dos banda tin di bisa y no solamente e director.