Departamento di Asunto di Consumidor (DHC) ta atendiendo cu e clientenan di e dos compania di telecomunicacion MIO y Scarlet cu a resulta perhudica pa nan servicio. Amanda Maduro kende ta PR y hurista di e departamento menciona a bisa cu e echo cu den un temporada corto den un isla asina chikito tin dos compania di telecomunicacion aworaki cu ta den problema financiero y cu no ta dunando e servicio adecua na nan clientenan, mester di atencion.

Pa loke ta e situacion di MIO, e ta haya cu ta uno diferente na esun di e compania Scarlet cu ta uno practicamente di sorpresa. Riba MIO tabatin informacion cu a sali den prensa, cu e informacion di falta di cumplimento di pago di nan licencia pa por funciona como compania di telecomunicacion. Aunke e compania no ta failliet, nan no tin licencia pa opera y no por brinda e servicio pa alrededor di 6 mil cliente. Sra. Maduro ta indica cu te aworaki nan a haya un keho di clientenan di MIO.

Posibilidad
Departamento di Asunto di Consumidor a acerca Setar pa puntra si tin posibilidad pa nan por tuma over clientenan di MIO. Nan a check si tin un forma pa yuda e clientenan den e transicion ya cu e clientenan aki ya caba ta den un situacion debil cu te hasta posiblemente nan a perde placa cu nan a paga of aparatonan cu nan a cumpra, etc..

Sra. Maduro a laga sa cu Setar no tin un areglo special pa e clientenan di MIO, pero nan tin un summer special cu ta duna oferta special pa habri cuenta nobo. Tambe nan a check si eventualmente tin posibilidad pa nan por keda cu nan mesun number. Sinembargo Setar tin otro sistema y no ta posibel pa e clientenan di MIO keda cu e mesun number.

Sra. Maduro a laga sa cu di locual nan ta compronde Digicel si tin un oferta special andando pa e clientenan di MIO. E cliente aki por habri un cuenta pre pago na Digicel y pa e tres prome lunanan enbes cu nan ta paga 60 florin nan ta paga 30 florin. Esaki ta exclusivamente pa e clientenan di MIO pero no pa e clientenan di Scarlet, ya cu nan situacion no ta mucho cla ainda. Sinembargo e departamento aki lo acerca Digicel pa propone pa extende nan oferta special aki pa e clientenan di Scarlet tambe. Pero tambe nan lo acerca Setar pa yuda e clientenan aki cu e transicion aki door di un areglo special.

Situacion Scarlet
Pa loke ta e compania Scarlet, e departamento di Asunto di Consumidor a cuminsa verifica si na Corsou tin un caso pendiente cu e compania aki. Nan lo monitor e situacion aki ya cu e señal cu nan tabata ofrece na Aruba a bin via e netwerk di e isla bisiña. “Si e netwerk aki a wordo corta na Corsou, Scarlet na Aruba no por duna e servicio tampoco y esey ta bay afecta e clientenan directamente”, el a bisa.

Te ainda no a drenta niun keho di nan clientenan den e departamento aki pero nan ta supone cu esaki ta debi cu e servicio di Scarlet no a corta completamente manera ta e situacion di MIO. Segun algun usuario, e servicio di Scarlet ta hopi malo y e ta bin y bay;  p’esey e clientenan t’ey ainda. Sra. Maduro di DHC a bisa cu si e servicio ta malo, e cliente tin tur derecho pa stop di paga ya cu nan no ta hayando e servicio optimal pa locual nan a paga pe. Tambe cliente mag di entrega keho.

P’esey e departamento di Asunto di Consumidor ta conseha pa e clientenan di Scarlet na Aruba stop tur e pagonan. Si e cliente tin pago cu ta bay automaticamente via di banco pa purba di stop esaki. Sra. Maduro a indica cu mirando e situacion di Scarlet, e ta mustra “manera cu tin un gran posibilidad cu nan no ta bay logra di duna e servicio”.

Derecho di ‘opschorting’
Mas e cliente ta paga, lo bira ainda mas dificil pa nan por haya e placa bek. E departamento aki cu ta salvaguardia derecho di consumido no a logra haya niun contacto cu un representante di Scarlet pa duna un informacion oficial. Mirando e panorama actual cu nan lo por stop nan servicio “ta di conseha pa stop e pago y haci uzo di e derecho di opschorting”, sra. Maduro a bisa na Bon Dia Aruba.

El a splica cu den ley ta stipula cu e cliente tin e derecho di suspende su pago si tin un bon rason cu ta mustra cu e otro partido no ta bay cumpli cu su obligacion. “Den e caso aki, e ta mustra asina y nos ta conseha e clientenan pa stop nan pago pa wak kico ta bay pasa cu e futuro di e compania.”

E echo aki ta pone e consumidonan den un situacion debil. El a bisa cu e clientenan aki cu den wowonan di nos ley ta un consumido, libremente por entrega un keho cerca nan departamento. Intencion di nan ta pa wak si por yuda den e situacion of si nan ta bay termina contract. E departamento aki por duna e clientenan aki un orientacion of conseho.