E guera entre sindicato FTA y Serlimar ta continua. Mescos cu tur otro
conferencia di prensa cu Sindicato FTA a yama, e mesun mensahe a keda
plama. Pa no paga pa servicio di sushi.
A bay asina leu cu Rudy Geerman, kende ta forma parti di directiva di
FTA a splica cu tin menasa di parti di e Serlimar cu si e ciudadano no
paga, nan lo stop di recoge sushi.
FTA kier a bisa cu e prome ciudadano cu esey tuma luga, laga FTA sa, manera ya bisa. E ta inaceptabel mirando cu tin proposicion riba mesa y den e caso aki gobierno no ta haci caso. Gobierno kier keda keto pa asina kere cu e otro ciudadanonan lo cuminsa paga, pero nan ta mal kiboca, pasobra ya caba esey no ta tuma luga. Ta bisa tur ciudadano pa ta pendiente. FTA a propone un reunion y ta spera cu e biaha aki si lo
haya e reunion pa por discuti e tema aki.
Segun Geerman, a splica e minister encarga cu esaki, Benny Sevinger, di e situacion aki. Den dos ocasion na papia cun’e y tambe cu Gaby Werleman, kende ta responsabel tambe pa loke ta Serlimar. Loke tin di compronde cu a traha un presupuesto y gobierno ta bisa cu e ta duna tanto placa y e diferencia ey a bay busca. P’esey FTA no a papia cu e director ainda, pasobra a cana e caminda via di e minister.
E pregunta ta keda cu si lo haya algo den e caso aki for di director. Awo no por bisa cu no y lo haci’e despues. Pero a scoge pa bay via minister, pasobra na final, ta for di eynan e ta bin.
Menos placa pa Serlimar
Geerman a añadi, cu gobierno a bisa cu e suma aki e ta duna y esey ta e problema. Si gobierno tabata duna antes 5 pa 6 miyon pa aña y ta dicidi cu ta 3 miyon so e ta duna, consecuentemente Serlimar ta keda cu 3 miyon menos. Ken a bisa cu ta tres miyon e mester duna sino 4 miyon. P’esey kier e reunion cu e minister, pasobra for di eynan ta bin cuanto Gobierno ta duna Serlimar.
FTA ta ripiti pa no tin confusion, nada contra di e clase trahado, nada contra. Ta duna bon servicio. Loke tin problema cu locual gobierno, hunto cu maneho di Serlimar, kier impone riba e ciudadanonan.
Mientras tanto di parti di Serlimar, nan ta hustifica e pago aki, mirando cu esaki ta andando for di 2005, pero en bes di cobra pueblo, ta cobra gobierno. Pero awo gobierno no ta pagando pa e servicio aki mas y manera cu ya sa caba, mester cobra pueblo directamente.
Apesar cu gobierno no ta cubri e pago di recogemento di sushi mas, nan tin cu keda cumpli cu su parti como cu Serlimar ta un entidad priva, di gobierno.
Serlimar di su banda, mester a uza nan creatividad pa bin cu servicionan nobo pa yena e buraco cual ta recogemento di sushi.
Awo no ta tur hende ta pagando, pero tin cu bisa si cu hopi hende a bira consciente. Esnan cu por paga a bin ta paga. Tin hopi hende tambe cu ta reaccionando cu nan no por pasa. Kier paga, pero no por y tin tur comprension pa nan. Y no a stop nan servicio tampoco.
Lionel Croes, kende ta vocero di Serlimar, a bisa na varios medio di comunicacion cu no por pone presion riba gobierno. Nan por duna gobierno conseho, cual ta haciendo, pero al final ta gobierno tin cu mustra e interes y wak tambe den e tempo relativo cu nan tin pa nan por asumi nan responsabilidad y atende cu e tema aki.
No lo parti boet ainda
Di parti di Serlimar a haci di bon boluntad, cumpliendo pa sigui duna servicio y no duna boet, no trece sancion, pasobra por haci esey tambe, pero ta opta pa no haci’e ainda. Mirando cu ta algo nobo, ta purba di conscientisa pueblo riba e importancia pa e garantisa e calidad di servicio cu nan ta ricibiendo, Serlimar a pasa den un periodo di prueba, di cambio sumamente importante den su existencia y tur hende ta notando esaki.
